Sinubruninn: Rannsaka hvort eldurinn hafi kviknað á nokkrum stöðum í einu

Fjöldi slökkviliðs- og lögreglumanna barðist fram á nótt við gríðar mikinn sinueld, sem kviknaði í Vatnsmýrinni, skammt frá húsi Íslenskrar erfðagreiningar rétt fyrir klukkan ellefu í gærkvöldi.

Beitt var þremur dælubílum frá slökkviliðinu og öflugum dælubíl frá slökkviliðinu á Reykjavíkurflugvelli, en eldurinn hafði dreifst á augabragði um stórt svæði þegar slökkvilið kom á vettvang.

Mikinn reyk lagði yfir stúdentagarðana og var íbúum ráðlagt að loka öllum gluggum. Nokkrum bílum var bjargað frá eldinum á því svæði og voru mannvirki ekki í hættu. Það tók slökkviliðið röskar tvær klukkustundir að ráða niðurlögum eldsins.

Ekki er vitað til að neinn hafi leitað læknis vegna reykeitrunar, en megn reykjarlykt barst inn í margar íbúðir í stúdentagörðunum. Eldsupptök eru með öllu óljós, en meðal annars er verið að kanna hvort eldurinn hafi kviknað á nokkrum stöðum nær samtímis.

Sé smellt á myndasafnið hér að neðan má sjá myndir sem Vigfús Björnsson, lesandi Vísis, smellti af á vettvangi.

Myndatökumaður Stöðvar 2 var einnig á vettvangi og sjá má myndkskeiðið með því að smella á tengilinn.