Tíundi sigur TCU

Helena Sverrisdóttir skoraði átján stig fyrir TCU sem vann átta stiga sigur á Colorade State í bandaríska háskólaboltanum í gær, 61-53.

Þetta var tíundi sigur TCU í tólf leikjum í Mountain West-riðlinum en liðið var þó sex stigum undir í hálfleik í nótt.

Helena fór mikinn í síðari hálfleik fyrir TCU og átti stóran þátt í sigri liðsins.

Hún átti auk stiganna átján fjórar stoðsendingar en hún tók einnig sjö fráköst, stal boltanum tvisvar en tapaði honum aðeins einu sinni. Alls lék hún í 31 mínútu og setti niður þrjá þrista í aðeins fjórum tilraunum í leiknum.

Liðið er í öðru sæti riðilsins en BYU er í því efsta með aðeins einn tapleik á tímabilinu til þessa.

TCU mætir þó BYU í næsta leik sínum nú strax á laugardaginn. Alls á liðið fjóra leiki eftir þar til að úrslitakeppnin hefst í næsta mánuði.