Skógræktarfélagið hvetur til mótmæla

„Gangi frumvarpið óbreytt í gegn mun það skaða skógrækt á Íslandi stórlega til frambúðar.“

Svo segir í bréfi sem Skógræktarfélag Íslands hefur sent aðildarfélögum sínum um allt land, 61 talsins. Tilefnið er framkomin drög að frumvarpi til breytinga á lögum um náttúruvernd, sem umhverfisráðherra hefur kynnt. Skógræktarfélagið hvetur aðildarfélögin í bréfinu til að mótmæla drögunum.

„Ljóst er að ekkert samráð hefur verið haft við Skógræktarfélag Íslands né einstök aðildarfélög þess af hálfu þeirrar nefndar sem samið hefur áðurnefndar frumvarpstillögur,“ segir enn fremur. „Ljóst er eftir aflestur frumvarpsins að það mun íþyngja mjög framkvæmd alls skógræktarstarfs í landinu.“

Þá segir að það virðist vera markviss tilgangur frumvarpsins að setja öllum „framandi lífverum“ meðal annars þeim trjátegundum, sem nú eru helst notaðar í skógrækt, skorður og hömlur, að því er virðist sakir þess að allar tegundir sem séu framandi gætu, í náinni eða fjarlægri framtíð, átt eftir að reynast ágengar og framandi lífverur.

„Í þessu sambandi ber að geta þess að 70% þeirra trjáa sem árlega eru gróðursett á Íslandi teljast „framandi lífverur“ í skilningi greinargerðar við frumvarpstillögurnar. Sömu aðilar og settu saman frumvarpstillögurnar hafa áður dæmt allar þær trjátegundir í flokk með „helstu ágengum og framandi tegundum á Íslandi“. Hafa þeir sent skrifstofu samnings Sameinuðu þjóðanna um líffræðilega fjölbreytni lista yfir 20 „verstu og ágengustu framandi lífverur í íslensku lífríki“, segir í bréfinu.

Þá er bent á að engin almenn sátt sé um það innan íslenska fræðasamfélagsins né annars staðar í samfélaginu um hvenær telja skuli lífveru framandi og hvenær innlenda. Komið verði á umfangsmiklu eftirlits-, skriffinnsku- og skattheimtukerfi þar sem allur innflutningur og ræktun framandi tegunda séu háð geðþótta og óskoruðu valdi eftirlitsstofnunar til leyfisveitinga. Auk þess verði ræktendum gert að vinna svokallað hættumat og greiða Umhverfisstofnun leyfisveitingu. Ráðherra fái heimild til að ganga þvert gegn stjórnarskrárvörðum eignarrétti og eyða tegundum á eignarlöndum samkvæmt mati eftirlitsstjórnvaldsins hverju sinni.

jss@frettabladid.is