Tónlist Miri í verðlaunastuttmynd frá Hong Kong

Hljómsveitin Miri á tónlistina í nýrri stuttmynd frá Hong Kong. Miri-menn áttu ekki von á að myndin yrði þekkt, en hún hlaut stærstu verðlaun á alþjóðlegri stuttmyndahátíð á dögunum.

„Jú, okkur fannst þetta mjög skemmtilegt,“ segir Óttar Brjánn Eyþórsson, gítarleikari austfirsku hljómsveitarinnar Miri.

Drengirnir í Miri tóku síðastliðið sumar vel í beiðni kvikmyndagerðarfólks frá Hong Kong um að fá að nota tónlistina þeirra við gerð stuttmyndar, og fengu í vikunni skemmtilegar fréttir af velgengni myndarinnar. Myndin, sem kallast Not Now But When, tók þátt í Fresh Wave International Short Film Festival og var valin mynd hátíðarinnar.

Aðspurður segir Óttar þá ekki hafa hugmynd um hvernig aðstandendur myndarinnar komust í kynni við tónlist sveitarinnar. „Tónlistin okkar er náttúrulega aðgengileg öllum á netinu, en maður hefur litla hugmynd um hversu langt út fyrir landsteinana hún berst. Það er alltaf gaman að fá staðfestingu á því að einhver er að hlusta á þetta.“

Stuttmyndin fjallar um unga stúlku sem er orðin þreytt á óréttlæti samfélagsins í Kína og bíður spennt eftir heimsendi sem hún vonar að komi árið 2012. Lög Miri hljóma bæði í kynningarstiklu myndarinnar sem og í myndinni sjálfri, og líklegt er að hljómsveitin eignist nýjan hlustendahóp vegna dreifingar myndarinnar.

Þeir hyggja þó ekki á landvinninga í Kína eins og er, en fara í stað þess þriðju ferð sína til Kanada í byrjun næsta árs. „Við fórum tvær góðar ferðir þangað í sumar og spiluðum á tveimur tónlistarhátíðum. Nú bætist sú þriðja í hópinn í mars. Við kunnum afskaplega vel við okkur í Kanada og erum orðnir tíðir gestir þarna.“

bergthora@frettabladid.is