Dikta vonast eftir fyrirgefningu

„Við vonum að kirkjunnar menn fyrirgefi okkur þetta. Þetta er hús fyrirgefningarinnar,“ segir Skúli Z. Gestsson, bassaleikari Diktu.

Skúla tókst að brjóta píanóið í Vídalínskirkju á tónleikum þar í síðustu viku. Óhappið átti sér stað í jólalaginu Hátíð í bæ þegar Skúli hafði tekið við af söngvaranum og píanóleikaranum Hauki Heiðari og sest við píanóið.

„Það flugu þarna nótur upp úr píanóinu. Við vitum ekki hver var að verki, hvort almættið hafði eitthvað á móti svörtu nótunum. Það var þannig í gamla daga en ég veit ekki hvort það er þannig í dag,“ segir Skúli í léttum dúr.

Þetta var þriðja árið í röð sem Dikta heldur tónleika í Vídalínskirkju í heimabæ sínum Garðabæ. Í þetta sinn voru tónleikarnir í fyrsta sinn tvennir og í ár var hin vinsæla Of Monsters and Men gestahljómsveit, enda einnig úr Garðabæ. „Þetta var rosalega skemmtilegt og krakkarnir í Monsters stóðu sig gríðarlega vel,“ segir Skúli. Saman sungu hljómsveitirnar lokalagið Nóttin var sú ágæt ein sem Dikta hefur tekið upp á sína arma á hverjum jólum.

Dikta gaf nýverið út sína fjórðu plötu, Trust Me. „Við erum rosa sáttir við plötuna og erum í góðum gír,“ segir Skúli. Myndband við lagið Cycles kemur út á næsta ári en þar er bandaríski glímukappinn Dean Lister í aðalhlutverki. „Við vorum að tala við Mjölnismenn og hann var akkúrat á landinu. Hann var rosalega til í þetta, þannig að við slógum til. Þetta verður alveg svakalegt myndband og afar blóðugt.“ - fb