Blanda af tveimur menningarheimum

Systurnar María Björg og Guðrún Sigurðardætur hanna fallegan tískufatnað undir nafninu Klukka. Fyrsta lína systranna kom út fyrir skömmu og fæst meðal annars í versluninni Kiosk.

María var einn af stofnendum Kiosk á sínum tíma en dró sig í hlé stuttu eftir opnun verslunarinnar til að sinna öðrum verkefnum. Hún ákvað síðan fyrir stuttu að taka höndum saman við systur sína og gefa út litla línu fyrir jólin sem inniheldur meðal annars kjóla, slár og fylgihluti.

„Kjólarnir eru úr silki og með handteiknuðu munstri og eru framleiddir hér á landi. Móttökurnar hafa verið mjög góðar, ég hef fundið fyrir auknum áhuga fólks á íslenskri hönnun og verslunum eins og Kiosk sem reknar eru af hönnuðum," útskýrir María.

Systurnar ólust upp í Englandi til unglingsaldurs og segir María að fatasmekkur þeirra sé blanda af þeim breska og íslenska og hönnun þeirra sömuleiðis.

„Íslendingar og Skandinavar hafa einkennandi útlit og smekk sem ræðst bæði af veðurfari og menningu okkar. Bretinn er aftur á móti klassískari og tekur færri sénsa þegar kemur að tísku en leggur mikið upp úr góðum efnum og sniðum. Hönnun okkar tekur mið af þessu tvennu, við erum með sígilda vöru sem kaupandinn ætti að geta notað í mörg ár og úr besta efni sem völ er á en hressum upp á útlit flíkurinnar með skemmtilegu handteiknuðu munstri."

María er menntaður fatahönnuður frá LHÍ og starfaði áður sem aðstoðarinnkaupastjóri tískudeildar Harrods í London í fimm ár. Guðrún starfaði einnig hjá sömu verslun í eitt ár og hafa systurnar því báðar verið viðloðandi tískubransann í nokkurn tíma.

Ný lína er væntanleg frá systrunum með vorinu. Allar nánari upplýsingar má finna á heimasíðu þeirra myklukka.is.

sara@frettabladid.is