Gibb á batavegi

Söngvarinn Robin Gibb hefur fullvissað aðdáendur sína um að hann sé ekki á grafarbakkanum eins og breskir fjölmiðlar hafa gefið í skyn. Hann sé þvert á móti á góðum batavegi þrátt fyrir að hafa verið lagður inn á sjúkrahús í annað sinn á skömmum tíma í síðustu viku. Gibb ætlaði að koma fram á jólatónleikum Björgvins Halldórssonar en varð að aflýsa komu sinni sökum veikinda.

Gibb greindist með ristilbólgu og í kjölfarið fór af stað hávær orðrómur þess efnis að Gibb væri með lifrarkrabbamein en bróðir Robins, Maurice, dó úr krabbameini í ristli árið 2003. Robin hefur hins vegar neitað að tjá sig um eðli veikinda sinna, hefur eingöngu sagt að honum hafi ekki liðið vel. Á bloggi söngvarans kemur fram þakklæti til fjölskyldu og vina og ekki síst allra þeirra aðdáenda sem hafi sent honum batakveðjur. „Bænir ykkar og góðar óskir hafa verið mér mikils virði.“