Victoria's Secret fyrirsæta klæðist Kalda

„Þetta er frekar gaman og auðvitað góð auglýsing fyrir merkið," segir Katrín Alda Rafnsdóttir, annar hönnuða íslenska fatamerkisins Kalda.

Sænska ofurfyrirsætan Carolina Winberg klæddist kjól frá Kalda í eftirpartýi eftir sýningu Victoria's Secret á dögunum.

Tískusýning Victoria's Secret er vinsælt umfjöllunarefni fjölmiðla um allan heim og hafa því myndir af fyrirsætunni í íslenskri hönnun birst víða.

„Carolina er í vinahópi með vinkonu okkar í New York og var svo elskuleg að sitja fyrir í auglýsingamyndum fyrir okkur en í staðinn gáfum við henni vel valdar flíkur frá Kalda," segir Katrín Alda.

Kjóllinn sem Winberg klæðist er úr sérstakri jólalínu merkisins sem fæst núna í búðinni Liberty í London og Einveru hér heima.

Winberg er fræg í tískuheiminum og hefur setið fyrir í auglýsingaherferðum fyrir tískuhús á borð við Valentino, Versace, Armani, Chloé, Ralph Lauren og nú einnig Kalda.

Það var íslenski ljósmyndarinn Silja Magg sem tók auglýsingamyndirnar af Winberg fyrir Kalda í New York fyrr í haust.

Kalda er að sækja í sig veðrið og hefur meðal annars verið fjallað um merkið á síðum sænska Elle, breska Vogue og Time Out Magazine.

„Það gengur vel og við erum að undirbúa næstu skref en vöru okkar hefur verið vel tekið í Liberty," segir Katrín Alda. -áp