Gerðu náttborð úr majónesfötu

„Ég var náttúrulega bara alltaf að mæta allt of seint í tíma," segir Guðmundur Hermann Salbergsson um hvernig hugmyndin kviknaði að verðlaunaverkefninu Náttborð – eitt með öllu, sem var valið Snilldarlausn Marels í Hugmyndakeppni framhaldsskólanna á dögunum. Ásamt Guðmundi tóku þátt í verkefninu Sigurður Jón Sigmundsson, Jón Gunnar Sæmundsson og Haukur Örn Harðarson, en þeir stunda allir nám við Fjölbrautaskóla Suðurnesja.

Nemendurnir sem tóku þátt í keppninni fengu engin fyrirmæli önnur en að gera sem mest virði úr ákveðnum hlut, sem í ár var dós. Náttborðið er búið til úr majónesfötu og er allt í senn lampi, hleðslustöð fyrir farsíma og hátalari. Innblásturinn fengu þeir frá íslenska skammdeginu og ekki leikur vafi á að borðið myndi hjálpa mörgum sem eiga erfitt með einbeitingu í morgunsárið. „Mér finnst erfitt að vakna og ég vissi aldrei hvar síminn minn var eða lyklarnir. Hugmyndin var að búa til einn geymslustað sem leysti öll þessi vandamál í einu – þú geymir lyklana þína, hleður símann og stingur honum svo í samband við hátalarann til að magna upp hljóðið í vekjaraklukkunni svo þú sofir örugglega ekki yfir þig," segir Guðmundur.

Strákarnir eru mjög áhugasamir um nýsköpun og eru ákveðnir í að taka aftur þátt á næsta ári. Á meðan geta þeir unnið áfram með náttborðið, því þeir segjast hafa ótal fleiri hugmyndir um hvað hægt væri að gera við það. „Við ætluðum til dæmis að hafa tengi fyrir iPod þannig að það væri hægt að hlusta á tónlist fyrir svefninn. Hægt er að vinna endalaust með þetta."- bb