Virðingin er skúrkanna, niðurlægingin fólksins

Jæja, þá vitum við hverjum íslenskar fjölskyldur sem misst hafa heimili sín og hrakist út á leigumarkaðinn eiga að þakka stökkbreytta húsaleigu á íbúðarhúsnæði. Bankarnir sitja á rúmlega 700 íbúðum og um 1.350 íbúðir eru á bókum íbúðalánasjóðs. Þessar íbúðir hafa lánadrottnarnir eignast vegna vanskila á lánum eigendanna og eru heimili fólks sem lent hefur í skuldavanda þar á meðal.

Þegar lánadrottnarnir hafa tekið heimilin af fólkinu og hrakið það út á götuna eru einu úrræðin að fara á leigumarkað til lengri tíma. Þetta hefur orsakað stóraukna eftirspurn eftir leiguhúsnæði. Lítið framboð á leiguhúsnæði hefur aftur á móti valdið því að leiguverð á íbúðarhúsnæði hefur rokið upp langt umfram það sem eðlilegt getur talist.

Nú kemur í ljós að lánadrottnarnir hafa haft áhrif á húsaleiguverð með því að láta íbúðir standa tómar þannig að framboð hefur verið af afar skornum skammti. Þeir hafa þannig haft óeðlileg áhrif á leigumarkaðinn. Þeim er alveg sama þótt margar fjölskyldur séu í húsnæðisvanda og séu nánast á götunni. Lánadrottnunum er líka slétt sama þó fjölskyldur sem höfðu ekki efni á mánaðarlegum afborgunum af eigin húsnæði þurfi að borga hærri upphæð á mánuði fyrir leiguhúsnæði. Ég sá nýlega 79 fm 2ja herb. íbúð auglýsta til leigu á 220.000 kr.á mánuði.

Nú þegar komist hefur upp um leikinn taka stjórnvöld loksins við sér og ætla að gera eitthvað í málinu. Það á að stórauka framboð á leiguhúsnæði en það á ekki að rétta hlut þeirra sem sitja uppi með stökkbreytta húsaleigu. Leigjenda sem margir hverjir eru nýbúnir að missa íbúðarhúsnæði sitt vegna stökkbreyttra lána. Markaðurinn á að ráða og þar stjórna peningaöflin leikreglunum eins og áður. Sjálfur velferðarráðherrann og jafnaðarmaðurinn Guðbjartur Hannesson vill ekki trufla skekktan markaðinn. Guðbjartur sagði í fréttum að þó að íbúðir ríkisins færu á leigumarkað ætti ekki að lækka húsaleiguna. Markaðurinn ætti að ráða húsaleigunni. „Ég trúi þessu ekki, Gutti, hvers vegna ætlarðu ekki að leigja þessar íbúðir út á sanngjörnu verði?” Skekkt framboð og eftirspurn eiga að ráða húsaleiguverði.

Velferðarráðherrann hefur aftur á móti lausn á málinu. „Aumingjavæðinguna”. Það á að borga þessu fólki bætur. Það á ekki að hafa áhrif á þá sem eru ennþá einu sinni að „gambla” á kostnað almennings. Búa til óréttlátar leikreglur sér í hag á kostnað fólksins. Nei, það á að sætta sig við óréttlætið og greiða fórnarlömbunum bætur. Allt til að viðhalda óréttlátu peningakerfi sem peningaöflin stjórna. Virðingin er skúrkanna, niðurlægingin fólksins, enn og aftur. Fer þessi þjóð ekki að fá nóg?