Elfar Freyr seldur í skugga deilna

Elfar Freyr Helgason er nýjasti atvinnumaður Íslands í knattspyrnu. Hann hélt á sunnudag til Grikklands og skrifaði í gærmorgun undir þriggja ára samning við AEK Aþenu.

Að sögn Blika átti Elfar Freyr aðeins að fara í læknisskoðun í Grikklandi en koma svo til móts við þá í Þrándheimi fyrir leik gærkvöldsins gegn Rosenborg í forkeppni meistaradeildar Evrópu.

Einar Kristján Jónsson, formaður knattspyrnudeildar Breiðabliks, er allt annað en sáttur við framgöngu gríska félagsins undanfarna daga. Að hans sögn var aðeins gefið leyfi fyrir því að Elfar Freyr færi í læknisskoðun í Grikklandi.

Á þriðjudagskvöld hafi AEK sett þeim stólinn fyrir dyrnar. Gæfu þeir ekki grænt ljós á að Elfar skrifaði undir myndu þeir rifta samningnum.

„Við erum í raun plataðir til þess að senda hann út [til Grikklands]. Svo þeir nái taki á honum og geti stillt honum upp við vegg gagnvart okkur. Við sjáum þetta ekkert öðruvísi. Við lærum af þessu og þetta gerist aldrei aftur,“ sagði Einar Kristján ósáttur við Grikkina.

Einar Kristján sakar Arnar Grétarsson, yfirmann knattspyrnumála hjá AEK, og gríska félagið um óheiðarleg vinnubrögð.

Að hans sögn hafi félögin enn ekki skrifað undir samning þótt komist hafi verið að samkomulagi um kaupverð í gegnum tölvupóst. Gríska félagið hafi í raun ekki mátt hafa nein afskipti af Elfari Frey fyrr en samningurinn hafi verið undirritaður.

„Þetta kennir manni að maður getur ekki treyst mönnum í viðskiptum þótt maður hafi haft þá sem samstarfsfélaga í einhver ár,“ segir Einar Kristján og á þar við Arnar Grétarsson sem er uppalinn Bliki.

Arnar er mjög ósáttur við ummæli Ólafs H. Kristjánssonar þjálfara Blika og Einars Kristjáns undanfarna daga. Eftir að liðin hafi sent tilboð og gagntilboð sín á milli hafi AEK gengið að kröfum Breiðabliks.

„Blikarnir settu upp samninginn eins og þeir voru sáttir við hann. Við samþykktum hann með því að stimpla hann, skrifa undir og senda til baka. Samþykkt. Hafi þeir viljað að leikmaðurinn spilaði einhverja leiki með þeim hlýtur að þurfa að minnast á það í samningnum sem breyta forsendum hans,“ sagði Arnar.

Hann bætir við að AEK hefði aldrei samþykkt samningsboð Breiðabliks hefði verið krafa um þátttöku Elfars í leikjunum gegn Rosenborg.

Arnar segir að málið hafi komið upp á fyrsta fundi hans með fulltrúum Breiðabliks. Þeir hafi lýst yfir áhuga á að fá að halda leikmanninum eitthvað lengur en það hafi verið skýrt af hálfu AEK að þeir væru að kaupa Elfar Frey til þess að mæta á fyrstu æfingu. Undirbúningstímabilið sé að fara í gang og það sé mikilvægt að hann sé með frá byrjun. Ekki síst fyrir möguleika hans í liðinu.

„Þeir sögðu þetta rosalega erfitt fyrir þá. Við værum að taka mikilvægasta manninn úr liðinu. Ég sagðist skilja þá ósköp vel en við værum ekki að kaupa neina varaskeifu hjá þeim. Við værum að kaupa besta leikmanninn. Ég sagði mína skoðun, þeir sína og svo fórum við í samningaviðræður og ekkert var minnst á þessa Evrópuleiki framar,“ sagði Arnar sem finnst málið sérstaklega leiðinlegt í ljósi uppruna síns. Hann sé grænn í gegn.