Stjórnlagaráð á leið til síðari umræðu

Allsherjarnefnd lýkur að öllum líkindum meðferð tillögu um skipun stjórnlagaráðs á fundi sínum í dag. Búist er við að síðari umræða um málið og atkvæðagreiðsla fari fram á allra næstu dögum.

Allsherjarnefnd ræddi málið á fjórum fundum í síðustu viku og fékk til sín fjölmarga gesti.

Róbert Marshall, formaður nefndarinnar, segir að farið hafi verið vandlega yfir málið. „Sitt sýnist hverjum um þessa aðferð en hún stangast ekki á við stjórnarskrána og er ekki brot á lögum. Sigurður Líndal sagði reyndar að þetta gæti hugsanlega flokkast undir stjórnarskrársniðgöngu en ég er ekki sammála því. Þetta er leiðin sem er pólitískur vilji til að fara og það eru fyrst og fremst pólitísk rök sem liggja henni til grundvallar."

Róbert segir meirihlutann leggja til tæknilegar breytingar á þingsályktunartillögunni, meðal annars þá að Alþingi skipi stjórnlagaráð en ekki forseti þess.

Vigdís Hauksdóttir, fulltrúi Framsóknarflokksins í allsherjarnefnd, er andvíg málinu. „Þeir stjórnskipunarfræðingar sem komu fyrir nefndina ráðlögðu að þessi leið yrði ekki farin. Ég tel því að með þessu máli sé gengið gegn góðri lagasetningu. Ég er talsmaður þess að við vöndum lagasetningu en það virðist eins og það eigi ekkert að læra af hruninu. Það er bara haldið áfram með bundið fyrir augun."

Vigdís segir að sér virðist sem málið snúist fyrst og fremst um að bjarga þeim kostnaði sem þegar hafi verið stofnað til með meiri kostnaði svo ekki þurfi að afskrifa alla upphæðina. „Það er það sem liggur undir þessari tillögu en ekki umhyggjan fyrir því að við fáum vandaða og góða stjórnarskrá."

Birgir Ármannsson Sjálfstæðisflokki staðfestir orð Vigdísar. „Þeir [lögfræðingarnir sem komu fyrir allsherjarnefnd] voru þeirrar skoðunar að það væri verið að fara á svig við niðurstöðu Hæstaréttar, sem væri óheppilegt."

Birgir segist munu leggja til að málið verði fellt. bjorn@frettabladid.is