Móðir grætur á öxl dóttur sinnar - Áhrif heimilisofbeldis

Börn sem horfa upp á fjölskyldumeðlimi sína, móður eða systkyni, verða fyrir ofbeldi eiga til að fyllast sektarkennd yfir því að þau hafi ekki sjálf orðið fyrir ofbeldi. Einnig er algengt að þeim líði illa yfir því að þau hafi ekki hjálpað þeim sem varð fyrir ofbeldinu. Þetta kemur fram í nýrri skýrslu Barnaheilla um félagslegan stuðning og úrræði fyrir börn sem eru vitni að heimilisofbeldi.

„Þau upplifa kannski gríðarlega streitu, vegna þess að þau vita að í hvert sinn sem pabbi kemur að sækja þau, þá fer allt í loftið. Hann öskrar og æpir og lemur mömmu ... og þau sjá að það er þeim að kenna að pabbi lemur mömmu," er haft eftir framkvæmdastýru Kvennaathvarfsins í skýrslu Barnaheilla.

Börnin gera óraunhæfar kröfur til sín

Algengt er að börn sem búa við ofbeldi á heimilinu geri órauhhæfar kröfur til sín og gangi inn í alls konar óásættanleg hlutverk sem þau hafa ekki þroska til að sinna. Ýmsar ástæður geta verið fyrir þessari hegðun. Sumum barnanna finnst þau vera að bæta fyrir eitthvað sem þaú telja að þau hafi gert rangt, eða þaú telja sig vera að draga úr líkum á frekari spennu á heimilinu. Þannig reyna þau að vernda sig og aðra meðlimi fjölskyldunnar.

Lítill drengur leitaði að húsnæði fyrir móður sína

Í skýrslunni greinir starfskona Kvennaathvarfsins einnig frá „sláandi dæmi um þá ábyrgð, sem ungt barn tekur á sig, til að styðja móður sína. Átta ára drengur kom reglulega til starfskvennanna og bað um leigulista til að finna húsnæði fyrir sig og móður sína. Hann reyndi að finna út hvar ódýrast væri fyrir þau að leigja, með tilliti til staðsetningar, hversu háar húsaleigubætur væru greiddar í viðkomandi sveitarfélagi, og hver ferðakostnaðurinn yrði fyrir móður hans til að komast til vinnu."

Fjögurra ára með mömmu grátandi á öxlinni

Erlendar rannsóknir sýna einnig hvernig ung börn sem búa við ofbeldi eldast mun hraðar en árafjöldi þeirra segir til um. „Mamma grét á öxlinni á mér, en á það ekki að vera öfugt? Átt það ekki að vera þú sem ert grátandi á öxlunum á mömmu þinni? Ég sat í tröppunum með mömmu, fjögurra ára, hún grátandi á öxlinni á mér, spyrjandi mig hvað hún ætti að gera. En ég veit það ekki. Ég veit ekki hvernig á að bregðast við svona aðstæðum fjögurra ára gömul og þess vegna skilur þetta mikið eftir sig. Maður eldist fljótar," segir unglingsstúlkan Jodie við breska rannsakendur sem á síðasta ári birti niðurstöður rannsóknar sinnar á áhrifum heimilisofbeldis á börn.