Útilokar ekki frekari barneignir

Angelina Jolie útilokar ekki að eignast fleiri börn og það er því ekki loku fyrir það skotið að börn hennar Maddox, Zahara, Pax, Shiloh, Vivienne og Knox eignist litla systur eða bróður.

„Ég er ekki búin að skipuleggja neitt, en það er aldrei að vita,“ segir Jolie í viðtali við tímaritið Marie Claire. „Ég gæti orðið ólétt.“

Jolie leikstýrði á dögunum fyrstu myndinni sinni, In the Land of Blood and Honey, ásamt því að skrifa handritið. Hún segir ljóst að börnin hennar muni ekki sjá myndina í bráð, þar sem hún sé afar hrollvekjandi. „Ég nýtti öll tækifæri sem gáfust til að skrifa,“ segir hún. „Ég var kannski hálfnuð með hræðilegt atriði þegar ég heyrði:

„Mamma, viltu lesa fyrir mig?“ þannig að ég gerði hlé á vinnunni til að lesa sögu um kanínuþorp.“