Páll Magnússon fundaði með Steingrími

21. október 2011 10:56

Ráðning Páls Magnússonar, hefur verið mjög umdeild.

Páll Magnússon, nýráðinn forstjóri Bankasýslu ríksins, fundaði með Steingrími J. Sigfússyni, fjármálaráðherra, þann 10. október síðastliðinn, þar sem ráðherrann kom sjónarmiðum sínum á framfæri. Fundurinn var haldinn fyrir milligöngu Þorsteins Þorsteinssonar, stjórnarformanns Bankasýslu ríkisins.

Þremur dögum eftir fundinn skilaði stjórn Bankasýslunnar rökstuðningi fyrir ráðningu Páls, sem hefur verið harðlega gagnrýnd, meðal annars af öðrum umsækjendum.

Þorsteinn segir í samtali við Vísi að stjórn Bankasýslunnar hafi ekki rætt málefni Páls sérstaklega á fundum sínum í vikunni, en RÚV greindi frá því á sunnudagskvöldinu, að Páll myndi ekki taka sæti sem forstjóri sýslunnar.

Þorsteinn segir ekkert annað standa til í augnablikinu en að Páll taki við starfinu. Spurður hvenær hann tæki við svarar Þorsteinn því til að það sé óráðið. Hann bendir á að fráfarandi forstjóri Bankasýslunnar, Elín Jónsdóttir, sem sagði upp störfum í sumar, sé á sex mánaða uppsagnafresti, sem rennur út um áramótin. Því má vera að Páll taki ekki við starfinu fyrr en þá.

Þorsteinn segist reikna með að Bankasýslan muni funda um málefni Páls þegar færi gefst, en nú sé stjórnin upptekin við söluferli hlutabréfa, sem ríkið á í ýmsum sparisjóðum.

Tengdar fréttir

Treystir því að Páll hafi verið ráðinn á faglegum forsendum

Steingrímur J. Sigfússon, fjármálaráðherra, segist treysta því að faglega hafi verið staðið að ráðningu Páls Magnússonar í starf forstjóra Bankasýslu ríkisins. Steingrímur ætlar hins vegar að óska eftir upplýsingum um ráðningarferlið.

4. október 2011 12:05

Ráðherra hyggst óska skýringa

"Þú getur rétt ímyndað þér hvort ég hafi ekki skoðanir á þessu en ég bara kýs að tjá mig ekki að svo stöddu,“ segir Páll Magnússon, nýráðinn forstjóri Bankasýslu ríkisins, um háværar gagnrýnisraddir sem heyrst hafa um ráðninguna. Málið standi ekki upp á hann heldur stjórn Bankasýslunnar.

7. október 2011 06:00

Bankasýslan réði reynsluminnsta umsækjandann

Páll Magnússon, nýráðinn forstjóri Bankasýslu ríkisins, er sá umsækjenda um starfið sem minnsta reynslu hefur af störfum fyrir fjármálastofnanir. Stjórnarformaður Bankasýslunnar telur að tengsl Páls við einkavæðingu bankanna sé ekki ókostur fyrir starfið. Aðrir umsækjendur um stöðuna voru: Karl Finnbogason sem starfar sem sérfræðingur hjá eignastýringu Bankasýslu ríkisins. Hann er með framhaldsmenntun í hagfræði og hefur um þriggja ára reynsla af stjórnunarstörfum hjá fjármálastofnunum. Kolbrún Jónsdóttir viðskiptafræðingur. Hún situr í stjórn Íslandsbanka fyrir hönd Bankasýslu ríkisins og hefur rúmlega áratugs reynslu af stjórnunarstörfum hjá fjármálastofnunum Ólafur Örn Ingólfsson hagfræðingur sótti einnig um. Hann hefur um 30 ára reynsla af störfum í fjármálastofnunum, stærstan hluta sem stjórnandi. Páll Magnússon er með BA í guðfræði og MPA í opinberri stjórnsýslu. Hann hefur sinnt fjölda trúnaðarstarfa fyrir Framsóknarflokkinn; vður bæjarritari hjá Kópavogsbæ, sviðsstjóri stjórnsýslusviðs, aðstoðarmaður ráðherra og stjórnarmaður hjá Landsvirkjun. Af þessu er ljóst að Páll er með minnstu menntunina og minnstu reynsluna þegar kemur að störfum hjá fjármálastofnunum. "Það er rétt hjá þér að Páll skoraði ekki fremst umsækjenda á þessum sviði en heildarmatið var honum í vil en það eru margir þættir sem eru metnir," segir Þorsteinn Þorsteinsson, stjórnarformaður Bankasýslunnar. Það er stjórn stofnunarinnar sem sá alfarið um ráðninguna, í samvinnu við Capacent. Aðspurður segir Þorsteinn að það hafi ekki verið neitt eitt atriðið sem gerði útslagið vegna ráðningar Páls. "Nei, ég mynd ekki segja það hefði verið eitt kannski. Hann stóð sig mjög vel í viðtölum og kom vel fyrir og fékk mjög góðmeðmæli," segir hann. Þorsteinn nefnir sérstaklega að Páll hefur víðtæka reynslu úr stjórnkerfinu og það hafi vegið þungt. Trúnaðarstörf fyrir Framsóknarflokkinn eru áberandi á ferillsskrá Páls. Þorsteinn neitar því aðspurður að pólitík hafi ráðið för við ráðninguna. "Nei, það var alls ekki nein pólitík," segir hann. Páll var aðstoðarmaður Valgerðar Sverrisdóttur, fyrrverandi viðskiptaráðherra, þegar bankarnir voru einkavæddir. Nú er hann óneitanlega nokkuð tengdur einkavæðingunni og þessi einkavæðing var gagnrýnd í rannsóknarskýrslu alþingis. Finnst þér þetta ekki óheppilegt? "Við ákváðum að líta ekki til þessa sérstaklega og töldum að við hefðum ekki rétt til þess í raun og veru að setja á hann neinn mínus fyrir þetta atriði sérstaklega," segir Þorsteinn.

2. október 2011 18:45

Stjórnarformaður Bankasýslunnar kannast ekki við frétt RÚV

Stjórnarformaður Bankasýslu ríkisins, Þorsteinn Þorsteinsson, kannast ekki við það að Páll Magnússon taki ekki til starfa sem forstjóri Bankasýslu ríkisins eins og fréttastofa RÚV greindi frá.

16. október 2011 19:15

Forstjóri Bankasýslunnar með 845 þúsund í laun

Ráðning forstjóra Bankasýslu ríkisins er hneyksli, segir formaður efnahags- og viðskiptanefndar Alþingis. Páll Magnússon fær 845 þúsund krónur á mánuði þegar hann sest í forstjórastólinn.

6. október 2011 18:45

Óska eftir rökstuðningi fyrir ráðningu Páls

Umsækjendur um stöðu forstjóra Bankasýslu ríkisins hafa óskað eftir rökstuðningi fyrir ráðningu Páls Magnússonar í stöðu forstjóra stofnunarinnar. Páll Magnússon, fyrrverandi aðstoðarmaður iðnaðarráðherra, var ráðinn í starfið en hann er með BA próf í guðfræði og meistarapróf í opinberri stjórnsýslu. Aðrir umsækjendur höfðu menntun sem var sérsniðnari að störfum í bankakerfinu.

12. október 2011 09:45