Páll fundaði með stjórn Bankasýslunnar

Stjórn Bankasýslu ríkisins fékk Pál Magnússon, nýráðinn forstjóra, á fund sinn á mánudagskvöld. Á fundinum var meðal annars skipst á skoðunum um þá gagnrýni sem ráðningin hefur fengið og rætt um hvenær Páll getur hafið störf sem forstjóri. Þorsteinn Þorsteinsson, stjórnarformaður Bankasýslunnar, segir að engar ákvarðanir hafi verið teknar á fundinum, sem var sá fyrsti og eini sem stjórnarmenn hafa átt með Páli eftir að tilkynnt var um ráðningu hans.

Fundurinn var haldinn daginn eftir að RÚV flutti fréttir af því að Páll yrði ekki forstjóri þrátt fyrir að hafa þegar verið ráðinn, nokkuð sem Þorsteinn segist ekki kannast við.

Uppsagnarfrestur Páls sem bæjarritari Kópavogs er þrír mánuðir, en tilkynnt var um ráðningu hans til Bankasýslunnar fyrir tæpum mánuði.

Uppsagnarfrestur fráfarandi forstjóra Bankasýslunnar, Elínar Jónsdóttir, rennur út um áramót og því mögulegt að Páll hefji ekki störf fyrr en þá.  Þorsteinn segir þó vonir standa til að hann hefji störf fyrr.

Eins og fréttastofa greindi frá í morgun kom Páll á fund Steingríms J. Sigfússonar, fjármálaráðherra, mánudaginn 10. október þar sem ráðherra gerði grein fyrir sínum sjónarmiðum varðandi ráðninguna.

Samkvæmt Þorsteini bendir ekkert til annars en að Páll hefji störf sem forstjóri innan tíðar.