Lögreglan óskar eftir ábendingum vegna dýraníðs

Lögreglan á höfuðborgarsvæðinu óskar eftir ábendingum frá almenningi vegna rannsóknar misþyrmingu á hryssu í hesthúsi við Heimsenda í Kópavogi. Atvikið varð 18. október síðastliðinn.

Farið var inn í hesthúsið. Innandyra voru nokkur hross en talið er að einu þeirra hafi verið veittir áverkar á kynfæri. Lögreglan óskar eftir upplýsingum frá þeim sem kunna að hafa orðið varir við grunsamlegar mannaferðir á þessum slóðum frá því seint á mánudagskvöld og fram á þriðjudagsmorgun, eða frá miðnætti til átta að morgni. Upplýsingum má koma á framfæri í síma 444-1000 eða á netfangið abending@lrh.is

Samskonar mál voru tilkynnt til lögreglunnar í síðasta mánuði eftir að áverkar fundust á kynfærum nokkurra hrossa, sem höfðu verið í hagabeit í landi Meðalfells í Kjós. Áverkarnir, líkt og í Kópavogi núna, eru taldir vera af mannavöldum.