Starfsmenn Faxaflóahafnar þurfa að gangast undir geðrannsókn

„Við höfum bara hag okkar starfsmanna í huga," sagði yfirhafnsögumaðurinn Gísli Jóhann Hallsson, en starfsmenn hafnarþjónustu Faxaflóahafnar verður gert að sæta læknisskoðun á árinu þar sem andlegt ástand þeirra verður meðal annars skoðað.

Um er að ræða almenna læknisskoðun þar sem líkamlegt og andlegt ástand starfsmanna hafnarþjónustunnar verður metið. Þeir starfa meðal annars við að lóðsa skip til hafnar. Miðað er við að fyrsti hópurinn fari í skoðun upp úr miðjum mars.

Starfsmenn hafnarþjónustunnar eru hinsvegar allt annað en sáttir við fyrirhugaða læknisskoðun. Þannig sagði einn sem Visir ræddi við að þeir hefðu flestir skipstjórnarréttindi og því þyrftu þeir hvort sem er að gangast undir læknisskoðun á fimm ára fresti.

Samkvæmt bréfi sem starfsmennirnir fengu þann 7. janúar þá kemur fram að allir starfsmennirnir verði þolprófaðir á æfingahjóli í sex mínútur. Í bréfinu segir að tilgangur læknisskoðunarinnar sé fyrst og fremst sá að starfsmenn átti sig sjálfir á ástandi sínu enda læknum óheimilt að upplýsa vinnuveitendur um niðurstöður þeirra nema mjög almennt.

Aðspurður hvort Gísli Jóhann hafi heyrt af óánægju starfsmanna svarar hann því til að hann hafi ekki heyrt neitt um það.

„En starfið er þess eðlis að það reynir á líkamlega partinn, til að mynda í óveðri. Þannig lést einn kollegi okkur við störf," sagði Gísli Jóhann til þess að undirstrika hversu mikilvægt líkamlegt ástand hafnarstarfsmanna sé.

„Þetta er nú helst til þess að fyrirbyggja slys," útskýrði Gísli Jóhann. Aðspurður hvort það hefði einhverjar afleiðingar fyrir starfsmennina ef þeir neituðu að gangast undir skoðunina, til að mynda hvað varðar geðheilsuna, svaraði Gísli: „Ég hef ekki verið með neinar hótanir."

Starfsmaður hafnarþjónustunnar sem Vísir ræddi við, og vildi ekki koma fram undir nafni, kveið heldur betur geðheilsumatinu og spurði: „Er það ekki bara fyrir klikkaða glæpamenn?"

Fyrirhugað er að starfsmenn fari í læknisskoðun reglulega í framtíðinni, en aldur og ástand mun ráða því hversu tíðar þær verða.