Vegagerðin flytur bíla og fólk yfir Múlakvísl

Stjórnvöld hafa heimilað Vegagerðinni að flytja megi fólk yfir vað á Múlakvísl á vörubifreið eða sérútbúinni rútu og einnig að flytja bíla yfir með vörubifreiðum samkvæmt tilkynningu frá Vegagerðinni.

Þar segir að bílar eru komnir á staðinn og hefjast flutningar innan skamms eða um leið og vað verður tilbúið.

Björgunarsveitir munu skipuleggja ferðirnar yfir kvíslina en Vegagerðin sér um vaðið og heldur því við. Tvær sérútbúnar vörubifreiðir og langferðabifreið munu verða í flutningum yfir Múlakvísl. Björgunarsveitarmenn og lögreglan munu fylgjast með þessum ferðum og vakta svæðið.

Vegagerðin ber kostnaðinn af þessum flutningi sem verður almenningi að kostnaðarlausu. Selflutningarnir munu standa yfir frá klukkan 8 á morgnana til klukkan 16 daglega. Einnig vinnur Vegagerðin að því að bæta allar merkingar, sérstaklega með erlenda ferðamenn í huga.

Unnið er af fullum krafti við byggingu bráðabrigðabrúar yfir Múlakvísl. Unnið er í jarðvinnu á svæðinu, m.a. fyllingu svo hægt sé að vinna á svæðinu og losun á grjóti í rofvarnir.

Allt efni sem þarf til byggingar brúarinnar er til þ.e.a.s. stálbitar og timbur og er unnið að flutningi þess á staðinn. Hluti tækja er kominn austur og það sem vantar af tækjum er á leiðinni.

Báðir brúarvinnuflokkar Vegagerðarinnar koma á staðinn í dag með lið sitt og búnað. Bætt verður við mannskap eftir þörfum.

Bráðabrigðabrúin verður 150-160 m löng en ekki er talið ráðlegt að minnka vatnsopið frá því sem það er núna. Brúin verður vestan við gömlu brúna.

Verið er að bæta í vegina bæði á Fjallabaksleið nyrðri og Dómadalsleið og eru tæki á staðnum. Hraður akstur gæti þó farið illa með vegina og vöð en settar verða upp merkingar um 60 km hámarkshraða og 5 km leiðbeinandi hraða við vöð.

Öxulþungi verður takmarkaður við 7 tonn á báðum vegum. Veginum verður haldið við. Björgunarsveitir eru á Fjallabaksleið.

Þá funduðu Almannavarnir með aðilum í ferðaþjónustunni í dag og var farið yfir atburði síðustu daga og afleiðingar hlaupsins í Múlakvísl. Áhersla var lögð á að koma á vegasambandi á þjóðvegi 1 við Múlakvísl.

Vísindamenn flugu yfir jökulinn í dag og þar eru engar sjáanlegar breytingar frá síðasta vísindamannaflugi sem var laugardaginn 9. júlí.