Enn skelfur Katla

Enn eru skjálftar í Kötlu en jarðskjálfti mældist skömmu fyrir sex, en hann var 3,2 á richter samkvæmt upplýsingum frá Veðurstofu Íslands. Fjórir skjálftar hafa mælst eftir hádegi í dag yfir tvö á richter.

Skjálftavirknin nú er svipuð og hefur verið í Mýrdalsjökli og þykir ekki óeðlileg.

Í síðustu viku mældust 535 jarðskjálftar á landinu öllu. Skjálftahrinur voru út af Reykjanesi og norður af Siglunesi.

Mun færri niðurdælingarskjálftar mældust við Húsmúla en vikuna á undan.

Nokkrir skjálftar voru yfir þremur stigum, sá stærsti suður á Reykjaneshrygg, 3,4 stig og hinir út af Hafnarbergi vestast á Reykjanesskaga og norður af Siglunesi.