Óljóst um afdrif limsins - safnstjóri þögull sem gröfin

„Ég get hvorki játað né neitað þessu," svaraði Sigurður Hjartarson, safnstjóri Hins íslenska reðursafns, spurður hvort limur Páls Arasonar, hefði verið afhentur. Viðskiptablaðið greinir frá því á vef sínum að limurinn sé kominn í hendur Sigurðar.

„Þeir eru bara að gefa sér þetta," svaraði Sigurður þegar hann var spurður út í frétt Viðskiptablaðsins. Sigurður sagði í viðtali í gær að hann gerði sterklega ráð fyrir því að hann fengi liminn í hendurnar en Safnið hefur undir höndum fjögur vottuð gjafabréf vegna eintaka af tegundinni Homo Sapiens. Er limur Páls einn af þeim.

„Ég segi ekki neitt fyrr en Páll er kominn í gröfina," spurður hvenær safnið myndi þá fá liminn í hendurnar. Sjálfum finnst Sigurði ótimabært að ræða þetta mál áður en Páll verður jarðsunginn.