Innlent

Gagnrýnir tregðu ríkisins til að styrkja Kvikmyndaskólann

Kvikmyndaskóli Íslands fór fram á 360 prósenta hækkun á framlagi ríkisins í vetur - enda hafi skólinn fjórfaldast að stærð. Þráinn Bertelsson kvikmyndaleikstjóri og stjórnarþingmaður segir illa komið fyrir þjóðinni ef hún getur útskrifað 200 innheimtulögfræðinga árlega en ekki 50 kvikmyndagerðarmenn.

Í bréfi Kvikmyndaskólans til menntamálanefndar í mars - segir beint út: „Ef allt fer fram sem horfir þá verður Kvikmyndaskóli Íslands lagður niður nú sumar."

Skólinn er í kröggum og vill meira fé frá ríkinu, starfsfólk hefur ekki fengið laun í allt að fjóra mánuði og óvíst er hvort um 150 nemendur skólans fái að mæta í haust. Viðræður hafa staðið milli ráðuneytis og skólans í eitt ár en þótt tæpur mánuður sé þar til nemendur eigi að mæta í skólann hefur engin lending náðst.

Hver nemandi kostar 2,1 milljón, þar af greiða nemendur 1200 þúsund í skólagjöld - en skólinn vill að ríkið borgi rest eða 140 milljónir króna. Ríkið bauð hins vegar rúmar 56 milljónir - eftir því sem næst verður komist ber um 15 milljónir á milli núna:

Þráinn Bertelsson, kvikmyndaleikstjóri og stjórnarþingmaður, segir fimmtán milljónir króna vera lítið fé þegar það sé borið saman við afarkostinn, að leggja niður starfsemi skóla sem hafi unnið sér orðstír sem einn af betri kvikmyndaskólum Evrópu.

Kvikmyndaskólinn fullyrðir að 36 af 42 nemendum sem stóðust inntökupróf í vor hafi verið á atvinnuleysisskrá. „Það sér það hver heilvita maður hversu hagstætt það er eða hversu góð hagfræði það er að styrkja fólk frekar til náms heldur en að liggja heima hjá sér og horfa á DVD" segir Þráinn.

Hann segir að málið geti ekki snúist um þessa peninga, heldur kennir um stífni í kerfinu - svipaðri þeirri sem kvikmyndagerðarmenn fundu fyrir í árdaga kvikmyndagerðar á landinu en þegar ríkisstyrkur loks barst var hann að sögn Þráins „svona passlegur fyrir eina mynd á ári, og Hrafn Gunnlaugsson ætti að gera hana."

„Ef þetta land hefur ekki efni á að útskrifa 50 manns með einhverja bestu menntun fáanlega í kvikmyndagerð, á meðan við höfum efni á því að útskrifa hálfmenntaða 200 innheimtulögfræðinga á ári, þá er illa komið fyrir þessari þjóð"



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×