Sér Ólaf í Karli

Ólöf Pitt Jónsdóttir, eitt fórnarlamba Ólafs Skúlasonar, segist sjá Ólaf í Karli Sigurbjörnssyni. Hún segir Karl ekki tala af einlægni í biskupsmálinu svokallaða. Ólöf vill að Karl láti nú þegar af embætti biskups.

Séra Ólafur áreitti Ólöfu nokkrum sinnum fyrir tæpum 30 árum. Hún steig fram á síðasta ári og sagði frá áreitinu. Ólöf segist lengi hafa efast hvort hún ætti að greina frá samskiptum sínum og Ólafs sem hún segist hafa treyst á sínum tíma.

Vildi horfa framan í Karl

Kirkjuþing kom saman í morgun til að ræða um skýrslu rannsóknarnefndarinnar þar sem farið er fyrir biskupsmálið og viðbrögð kirkjunnar tilgreind. Þingið er öllum opið og meðal þeirra sem fylgjast með þinginu er Ólöf.

„Ég vildi horfa framan í biskup," segir Ólöf aðspurð af hverju hún hafi ákveðið að fylgjast með störfum kirkjuþings. Hún segist ekki hafa trúað Karli þegar hann fjallaði um skýrsluna í morgun. Auk þess fannst henni Karl standa með Ólafi. „Mér fannst hann ekki iðrast." Einlægni hafi skort í ræðu Karls. Ólöf segist hafa beðið eftir því að Karl segði af sér.

Nafn Ólafs kallaði fram tár

Ólöf táraðist í setningarræðu Péturs Kr. Hafsteins, forseta kirkjuþings, og þurfti að yfirgefa salinn um stund. Í samtali við fréttamann segir Ólöf að nafn Ólafs hafi kallað fram þessi viðbrögð. Hún eigi erfitt með að heyra nafn hans því hún sjá meðal annars fyrir sér hvar áreitið fór fram. Ólöf segir þessar tilfinningar hafa aukist eftir að hún fór markvisst að vinna með reynslu sína á síðasta ári.

Ólöf segist ekki sjá eftir að hafa mætt á kirkjuþingið þó hún hafi orðið fyrir miklum vonbrigðum með Karl og hans ræðu. Hún finni fyrir hlýhug frá mörgum líkt og á fundi í Vídalínskirkju í Garðabæ í lok ágúst á síðasta ári. Þá hittu tugir presta Ólöfu og tvær aðrar konur sem séra Ólafur braut gegn.

Ekki hafa þó allir sýnt Ólöfu hlýhug. Í samtali við fréttmann rifjar Ólöf upp ferð hennar í Hagkaup nýverið þar sem tvær konur, sem hún þekkir til, veittust að henni og höfðu upp stór orð í hennar garð. Konurnar vildu vita af hverju Ólöf hefði ákveðið að bíða þetta lengi með að segja frá áreiti séra Ólafs. Auk þess höfðu þær á orði að Ólöf hefði einungis stigið fram til að fá athygli, samúð og peninga.