Vill að ríki taki upp frjálsan hugbúnað

Richard Stallman er umdeildur maður. Hann hefur allan sinn feril barist fyrir frjálsum hugbúnaði, lagði grunninn að GNU-Linux stýrikerfinu og boðar fagnaðarerindi tölvufrelsis víða um heim.

Hann er nú staddur hér landi á vegum samtaka um stafrænt frelsi og heldur fyrirlestur í Fjölbrautarskólanum í Ármúla sem hefst klukkan eitt á morgun.

„Það er óréttlátt að eigandi hugbúnaðar stjórni notandanum. Grunnhugmynd hreyfingarinnar um frjálsan hugbúnað er að við eigum að taka stjórn á okkar eigin tölvunotkun með að hafna þeirri hugmynd að stjórn hugbúnaðar sé ekki í okkar eigin höndum," segir Richard Stallman.

Fyrir tilstilli Richard sögðu yfir 12 þúsund skólar á Indlandi upp samningum sínum við Microsoft og frjáls hugbúnaður var tekinn upp í staðinn. Hann hvetur íslensk stjórnvöld til að gera slíkt hið sama

„Með því að taka upp frjálsan hugbúnað í skólum læra krakkarnir mun meira en þegar þeir eru háðir ófrjálsum hugbúnaði og þetta er eitt af því sem þarf að breyta."

Hann segir ríki ekki geta talist sjálfstæð hafi þau ekki stjórn á eigin tölvukerfum.

„Stofnanir ríkja eiga að fara fram á að hafa stjórn á þeirra eigin tölvukerfum. Það er hluti af því að teljast sjálfstætt ríki. Þess vegna eiga ríkisstofnanir aldrei að leyfa sér að nota ófrjáls forrit og hugbúnað. Þau mega ekki leyfa einkafyrirtækjum að stjórna tölvukerfum sínum því ólíkt einstaklingum, sem nota tölvur fyrir sína eigin hagsmuni, þá nota ríki tölvukerfi fyrir hagsmuni samfélagsins."

Ef þú værir staddur í læstu herbergi þar sem væru aðeins tvær tölvur, önnur með Windows stýrikerfinu og hin Apple. Hvor tölvuna myndirðu velja?

„Ég myndi nota tölvurnar í eins stuttan tíma og hægt er til að búa til kerfi byggt á frjálsum hugbúnaði sem leysir hin af hólmi."

Hægt er að horfa á allt viðtalið við Richard Stallman hér.