Verðbólguálagið hefur tvöfaldast frá áramótum

Verðbólguálag á skuldabréfamarkaði er nú nærri tvöfalt hærra en það var í upphafi árs. Álagið er nú 4,3% til 5 ára, en um áramótin var það 2,1%. Það má því segja að skuldabréfamarkaður endurspegli litla trú markaðsaðila á því að fyrirheit stjórnvalda í kjarasamningum um verulega styrkingu krónu og verðbólgu við markmið Seðlabankans næstu misserin gangi eftir.

Fjallað er um málið í Morgunkorni greiningar Íslandsbanka. Þar segir að hækkun álagsins er að mestu tilkomin vegna hækkunar á kröfu óverðtryggðra ríkisbréfa, en einnig hefur krafa íbúðabréfa lækkað nokkuð á tímabilinu.

„Verðbólguálag á markaði hefur sveiflast verulega undanfarin misseri. Mat okkar er að álagið ýki nokkuð þær breytingar sem hafa orðið á verðbólguhorfum frá einum tíma til annars, en einnig ber að hafa í huga að aðstæður á markaði geta einnig haft tímabundin áhrif á álagið, jafnvel af ástæðum sem ekki tengjast verðbólguvæntingum á neinn hátt. Þar er nærtækt að benda á þróunina á kröfu stystu ríkisbréfaflokkanna annars vegar, og íbúðabréfaflokksins HFF14 hins vegar, en þróun þessara flokka ræður miklu um reiknað verðbólguálag til 3-4 ára,“ segir í Morgunkorninu.

„Krafa stuttu ríkisbréfanna hefur verið undir stýrivöxtum Seðlabankans um nokkurt skeið, enda eru bréfin vinsæl hjá erlendum krónueigendum. Þrýsti þetta að mati okkar verðbólguálaginu til skemmri tíma niður fyrir almennar verðbólguvæntingar framan af vetri. Upp úr áramótum brá hins vegar svo við að áhugi erlendra fjárfesta á HFF14-bréfunum jókst verulega, enda eru þau þeirrar náttúru að útlendingar sem þau kaupa fá leyfi til að kaupa gjaldeyri fyrir afborganir af höfuðstól þeirra og geta þannig fengið fjárfestingu sína endurgreidda í gjaldeyri jafnt og þétt á næstu þremur árum. Þetta hefur orðið til þess að þrýsta kröfu niður fyrir 0% á stundum og hækka verðbólguálagið til skemmri tíma að sama skapi.“

Þá segir að hvað sem þessu líður er ljóst að fjárfestar hafa ástæðu til þess að vænta meiri verðbólgu næstu misserin en horfur voru á um síðustu áramót. Veiking krónu, niðurstaða kjarasamninga, þróun orku- og hrávöruverðs og einskiptisliðir á borð við mikla gjaldskrárhækkun OR og leiðréttingu Hagstofu á hluta húsnæðisliðar VNV hefur allt lagst á eitt um að breyta verðbólguhorfum.

Nú er útlit fyrir að verðbólga verði talsvert yfir 2,5% markmiði Seðlabankans í lok árs, og að svipað verði upp á teningnum fram eftir næsta ári. Það má því segja að skuldabréfamarkaður endurspegli litla trú markaðsaðila á því að fyrirheit stjórnvalda í kjarasamningum um verulega styrkingu krónu og verðbólgu við markmið Seðlabankans næstu misserin gangi eftir.