Allegri: Við áttum skilið að fara áfram

Massimiliano Allegri, knattspyrnustjóri AC Milan, var vitanlega ósáttur við að falla úr leik í Meistaradeild Evrópu.

Liðið gerði í gær markalaust jafntefli við Tottenham í síðari leik liðanna í 16-liða úrslitum í Lundúnum. Tottenham vann fyrri leikinn, 1-0, og komst því áfram í fjórðungsúrslitin.

„Leikmennirnir stóðu sig vel í kvöld og ég tel að hefðum átt skilið að fara áfram miðað við þessa tvo leiki," sagði Allegri eftir leikinn í gær.

„En því miður reyndust mistök okkar í fyrri leiknum dýrkeypt. Við gerðum allt sem við gátum í kvöld og það eina sem vantaði upp á var að klára færin."

„Ég verð að hrósa strákunum. Þessi frammistaða veitir okkur vonandi það sjálfstraust fyrir titilbaráttuna í deildinni heima en við höfum stöðugt verið að bæta okkur að undanförnu."

„En ég er ekki ánægður og finnst það biturt að detta úr leik. Í þessum tveimur leikjum átti Tottenham eitt skot og skoraði úr því. Betra liðið vinnur ekki alltaf."