Bjarni vill endurskoða stjórnarskrána

„Ég lýsi mig reiðubúinn til þess að hefja nú þegar vinnu við endurskoðun stjórnarskrárinnar. Ég tek alvarlega þær athugasemdir sem fram hafa komið um að þinginu hafi mistekist í fortíðinni,“ segir Bjarni Benediktsson, formaður Sjálfstæðisflokksins. Hann segir að þau atriði sem menn telji að þurfi hvað helst að endurskoða standi ekki í sér. „Ég er tilbúinn til að setjast niður og ræða þau mál.“

Bjarni var gestur Sigurjóns M. Egilssonar á Bylgjunni í morgun. Þar gagnrýndi Bjarni harðlega framgöngu stjórnarflokkanna í málefnum stjórnlagaþingsins og nú stjórnlagaráðsins.

Hann sagði að um gæluverkefni Jóhönnu Sigurðardóttur, forsætisráðherra, væri að ræða. Betra væri að láta stjórnarskrána taka breytingum í ró og næði. „En ekki í einhverju krampakasti og pólitískum þvingunaraðgerðum eins og verið er að gera á Alþingi þar sem menn leggja sig í líma við að keyra í kringum niðurstöðu Hæstaréttar í málinu. Þetta var ógild kosning, hvort sem mönnum líkar betur eða verr. Það ber að virða.“

Bjarni vill hefja nú þegar endurskoðun á stjórnarskránni. Þá sagði hann: „Hefur einhvern tímann verið sest niður til dæmis með mér og mínum flokki og látið á það reyna hvort við getum ekki bara leyst þetta verkefni í þinginu," spurði Bjarni. „Hvers vegna ekki að setjast niður og skoða málið? Af hverju ekki að ganga í verkið? Alþingi er jú einu sinni sá aðili sem að einn hefur heimild til að breyta stjórnarskránni.“