Kannabisræktun stöðvuð á Akureyri

Lögreglan á Akureyri stöðvaði síðastliðinn föstudag kannabisræktun í íbúð í bænum. Hald var lagt á 14 kannabisplöntur, nokkra græðlinga og búnað til ræktunar. Við leit í íbúðinni var síðan lagt hald á um 20 grömm af marihuana sem er talið vera afgangur af fyrri ræktun á sama stað. Á síðasta ári lagði lögreglan á Norðurlandi hald á rúmlega kíló af maríjúana sem er mun meira en árin áður að því er fram kemur í tilkynningu.

Tveir menn á þrítugsaldri viðurkenndu við yfirheyrslur að hafa staðið að ræktuninni sem uppgötvaðist á föstudag. Á laugardaginn gripu svo lögreglumenn inn í fíkniefnaviðskipti sem áttu sér stað á miðri íbúðargötu á Akureyri. Þrír aðilar voru handteknir og í framhaldinu var framkvæmd húsleit á heimili þess sem var að selja efnin. Þar var lagt hald á um 70-80 grömm af marijúana. „Efninu hafði verið pakkað í sölueiningar og var falið á víð og dreif um íbúðina.“

Þá segir að aðfararnótt sunnudagsins síðasta var lögreglan kvödd að fjölbýlishúsi á Akureyri vegna kvartana undan samkvæmishávaða. „Er lögreglan kom á staðinn kom  í ljós að fíkniefnaneysla hafði átt sér þar stað. Þrír aðilar voru handteknir og smáræði af fíkniefnum var haldlagt, einnig tæki og tól til neyslu. Í framhaldinu var samkvæmið leyst upp. Öll þessi þrjú mál teljast upplýst.“

Eins og áður sagði lagði lögreglan á Norðurlandi hald á mun meira maríjúana en árin á undan, en árið 2009 voru haldlögð rúmlega 100 grömm og 30 grömm árið 2008. „Þarna er því um gríðarlega aukningu að ræða en þó í takt við það sem lögreglan er að sjá gerast í fíkniefnaheiminum hér á landi. Magn annarra haldlagðra fíkniefna er svipað á milli undanfarinna ára.“