Ungt fólk til athafna

Félags- og tryggingamálaráðuneytið hefur ýtt úr vör átaki í atvinnumálum ungs fólks undir yfirskriftinni „Ungt fólk til athafna“ og nær það til ungra atvinnuleitenda 25 ára og yngri á öllu landinu. Átakið hefur það að markmiði að ungum atvinnleitendum verði boðin vinna eða virkniúrræði innan þriggja mánaða frá atvinnumissi. Stefnt er að því að þessu markmiði verði náð fyrir 1. apríl 2010. Vinnumálastofnun sér um framkvæmd átaksins og er það í höndum þjónustuskrifstofa Vinnumálastofnunar á landsbyggðinni en í Reykjavík mun ný þjónustuskrifstofa sjá um ráðgjafarþjónustu við ungt fólk á höfuðborgarsvæðinu og verður sú skrifstofa opnuð 1. febrúar að Suðurlandsbraut 22 . Ráðnir hafa verið 10 nýir ráðgjafar til að sinna verkefninu, átta á höfuðborgarsvæðið og tveir á Suðrnes.

Áhrif atvinnuleysis

Í ágúst sl. skipuðu félags- og tryggingamálaráðuneytið og menntamálaraðuneyti ð starfshóp til að skoða stöðu ungra atvinnuleita. Starfshópurinn skilaði skýrslu í nóvember með tillögum að úrræðum og var megin niðurstaða hópsins að brýnt væri að grípa til aðgerða sem hefðu það meginmarkmið að hvetja ungt fólk til virkni. Starfshópurinn byggði niðurstöðu sína m.a. á rýnihópagreiningu meðal 18 – 24 ára langtímaatvinnulausra ungmenna á höfuðborgarsvæðinu og á Suðurnesjum, en þar mátti greina þær alvarlegu afleiðingar sem langatíma atvinnuleysi getur haft á andlega og líkamlega heilsu. Reynsla anarra þjóða af afleiðingum lantímaatvinnuleysis og aðgerðaleysis eru sömuleiðis víti til varnaðar og má þar nefna að í Finnlandi telja menn að heil kynslóð hafi týnst með hörmulegum afleiðingum fyrir einstaklingana og samfélagið í heild.

Ný og fjölbreytt tækifæri

Markmið átaksins er að koma ungum atvinnuleitendum í samfélagslega virkni í gegnum vinnu eða nám. Á árinu 2010 er markmiðið að skapa allt að 1200 ný námstækifæri í samstarfi við framhaldsskóla, símenntunarstofnanir, einkaskóla og frumgreinadeildir. Allt að 450 ný starfsþjálfunarpláss og störf við átaksverkefni í samstarfi við sveitarfélög, stofnanir og fyrirtæki. Allt að 400 ný tækifæri við sjálfboðaliðastörf m.a. í samstarfi við Rauða krossinn, ÍSÍ og önnur sjálfboðaliðasamtök. Allt að 400 ný pláss í vinnustofum, smiðjum (Fjölsmiðu )og í atvinnutengdri endurhæfingu.

Ferlið

Ráðgjafar Vinnumálastofnunar boða unga atvinnuleitendur til sín þar sem þeir fá kynningu á fjölbreyttum tækifærum og verkefnum sem þeim býðst að takast á við í atvinnuleysinu. Þeim býðst sömuleiðis öflug náms- og starfsráðgjöf og tækifæri til að kortleggja áhugasvið sitt og hæfni og aðstoð við að setja sér markmið til framtíðar varðandi náms- og starfsval. Það eina sem ekki er í boði er að velja aðgerðarleysi og óvirkni.

Samfélagsleg ábyrgð - þjóðarátak

Erlendar rannsóknir hafa sýnt að ungt fólk er sérstaklega viðkvæmt fyrir afleiðingum langtímatvinnuleysis og þykir sýnt að afleiðingar þess að hefja starfsferilinn í atvinnuleysi geti haft áhrif starfsævina á enda. Það er ljóst að til þess að koma í veg fyrir þessa vá þurfum við að kalla eftir þjóðarátaki. Verkefnisstjórn verkefnisins hefur síðustu vikur leitað eftir samstarfi við fjölmarga aðila, s.s. sveitarfélög, stéttarfélög, framhaldsskóla, símenntunarmiðstöðvar, sjálfboðaliðasamtök , atvinnurekendur og ýmsa sérfræðinga og hefur verið afar ánægjulegt að greina þann mikla stuðning sem verekfnið fær. Við viljum þakka fyrir þennan stuðning og hlökkum til samstarfsins.

Ungt fók til athafna fyrir unga fókið og framtíðina.

Höfundur er verkefnisstjóri.