Kynnir barnabókina um Rikku erlendis

„Þetta var alveg svakalega gaman og börnin voru mjög forvitin um Ísland,“ segir Hendrikka Waage, skartgripahönnuður og rithöfundur, en hún var nýlega að kynna bók sína, Rikka og töfrahringurinn, í bókaverslun Sameinuðu þjóðanna í New York. „Ég hef verið í nánu samstarfi við Sameinuðu þjóðirnar vegna góðgerðarsamtakanna minna, Kids Parliament, eða Alþingi unga fólksins, og þeir buðu mér því að vera með þetta kynningarkvöld í búðinni sinni. Bæði til að kynna bókina og sjálft landið okkar, Ísland,“ segir Hendrikka en þegar Fréttablaðið náði af henni tali var hún stödd á flugvelli í Aþenu á leið til London. „Ég er stanslaust á ferð og flugi um heiminn. Sem er bara frábært.“

Yfir hundrað manns voru mætt á kynninguna þar sem Hendrikka áritaði eintök og las upp úr bókinni. Meðal gesta á upplestrinum voru um 50 börn úr Vanderbilt YMCA-barnaskólanum í New York „Þau voru mjög forvitin um Ísland. Ég byrjaði á að spyrja hvað þau vissu um landið og þá rétti einn strákurinn upp hönd og sagði: „Já, ég veit það er allt undir ís.“ Ég gat sem betur fer leiðrétt það og sagt þeim aðeins betur frá Íslandi,“ segir Hendrikka glöð í bragði. Að upplestrinum loknum fengu öll börnin áritað eintak af bókinni, íslenska fánann og íslenskt vatn.

Bókin um Rikku og töfrahringinn er sú fyrsta í sjö bóka seríu en næsta bók kemur út fyrir næstu jól. „Bók númer tvö á að koma út fyrir jólin og fjallar hún um Rikku og töfrahringinn á Indlandi,“ segir Hendrikka en hún hefur mikið verið á Indlandi starfs síns vegna og fannst kominn tími til að kynna Indland fyrir börnunum. „Ég stefni á að gefa út tvær bækur á ári í seríunni, eina á vorin og eina á veturna, um hana Rikku og tek þá fyrir eitt land í einu,“ segir Hendrikka að lokum. - áp