Ragnhildur Steinunn og Haukur Ingi gera mynd um kynleiðréttingu

„Þetta er bara þessi venjulega stelpa sem gæti þess vegna staðið við hliðina á manni úti í búð án þess að maður gerði sér grein fyrir því að hún hefði einu sinni verið karlmaður," segir Ragnhildur Steinunn Jónsdóttir, sjónvarpskona, en hún hefur ásamt eiginmanni sínum, Hauki Inga Guðnasyni, sálfræðingi og leikmanni Keflavíkur í Pepsi-deildinni, unnið að gerð heimildarmyndar undanfarið eitt og hálft ár um 34 gamla stúlku sem fæddist í líkama karlmanns.

Myndin fékk nýverið vilyrði fyrir styrk hjá Kvikmyndamiðstöð Íslands en auk þess styrkir Vífilfell gerð hennar. Ragnhildur hefur notið aðstoðar hjá Hreyfimyndasmiðjunni og Poppola Pictures þar sem leikstjórinn Ólafur Jóhannesson ræður ríkjum.

Myndin fylgir konunni eftir árið áður en hún fer í kynleiðréttingu og svo árið eftir til að fylgjast með hvernig hið daglega líf gengur fyrir sig hjá fólki sem gengst undir svona mikla breytingu á sínu lífi. Myndin verður því ekki frumsýnd fyrr en næsta sumar.

Ragnhildur segir þau hjónin vera ágætis teymi. „Haukur Ingi er náttúrlega sálfræðingur og hefur því verið að kafa ofan í sálfræðikenningar um þetta málefni og andlega þáttinn. Ég er menntaður sjúkraþjálfari þannig að ég hef verið að pæla í líkamlega þættinum, hormónameðferðinni og aðgerðinni sjálfri." Ragnhildur kveðst hafa heillast strax af sögu þessarar konu. „Þegar hún sagði mér að hún hefði fæðst sem karlmaður þá hélt ég í alvörunni að hún væri að ljúga," segir Ragnhildur. Umræðan um kynleiðréttingu er enn mikið tabú í þjóðfélaginu. Og ímynd þeirra hefur kannski verið skrumskæld í fjölmiðlum. „Þegar við fórum að lesa okkur betur til um þetta þá komumst við að því að þetta eru yfirleitt einstaklingar sem falla vel inn í samfélagið og eru bara þessi venjulegi nágranni, bara hæglátir og rólegir."

Ragnhildur segir þau einfaldlega hafa slysast til að gera myndina. „Mér fannst þessi saga svo framandi og áhugaverð að mér rann blóðið til skyldunnar að leyfa öðrum að heyra hana og sjá." freyrgigja@frettabladid.is