Logi með enn einn stórleikinn

Logi Gunnarsson fór mikinn þegar að lið hans í sænsku úrvalsdeildinni, Solna, vann sigur á Borås í dag, 77-74.

Borås var með yfirhöndina, 72-68, þegar þrjár og hálf mínúta var til leiksloka en þá tók Logi til sinna mála. Hann setti niður þrist og minnkaði muninn í eitt stig og kom svo sínum mönnum yfir með körfu þegar ein og hálf mínúta var eftir.

Hann tryggði svo sínum mönnum endanlega sigurinn með því að skora úr tveimur vítaköstum þrettán sekúndum fyrir leikslok.

Logi var stigahæstur í sínu liði með 20 stig en hann lék í alls 33 mínútur. Hann tók sex fráköst, gaf fimm stoðsendingar og stal þar að auki sex boltum.

Solna er í sjötta sæti deildarinnar með sextán stig.