Bensínstöð óafgreidd eftir þrjú ár í kerfinu

„Þetta eru alveg ótrúleg vinnubrögð. Ég bara botna ekkert í þessu,“ segir Eyjólfur Vilhelmsson, eigandi jarðarinnar Fögrubrekku í Hrútafirði, um áralangar tafir á að sveitarstjórn Bæjarhrepps afgreiði umsókn um heimild til að reisa bensínstöð á landi hans.

Eyjólfur og Skeljungur hf. óskuðu eftir því á árinu 2006 að gerðar yrðu breytingar á skipulagi þannig að fyrirtækið gæti byggt þjónustustöð og verslun í landi Eyjólfs. Fagrabrekka er norðan við Brú í vestanverðum Hrútafirði, einmitt við hringveginn eftir að hann var fluttur fyrir nokkrum misserum. Nokkur hundruð metrum norðan við stæði fyrirhugaðrar bensínstöðvar Skeljungs er nýi Staðarskálinn sem N1 rekur.

Á síðasta hreppsnefndarfundi óskaði minnihlutinn eftir skýringum á því af hverju sveitarstjórnin hefði ekki auglýst breytt skipulag á Fögrubrekku þrátt fyrir að skipulagið hafi loks verið samþykkt í sveitarstjórn í ágúst 2008, eða fyrir einu og hálfu ári. „Farið er fram á að oddviti Bæjarhrepps veiti skýr og afdráttarlaus svör við því hvað tefur framgang þessa máls,“ sagði í bókun minnihlutans.

Sigurður Kjartansson oddviti veitti fá svör á fundinum en sagði þó að verið væri að „vinna í þessum málum“ og hann teldi eðlilegt að ný sveitarstjórn auglýsti breytingar á skipulaginu. Með öðrum orðum þá kveðst oddvitinn ætla að láta málið bíða þar til eftir sveitarstjórnarkosningar í maí.

„Ég ætla ekkert að svara því bara. Það er bara mín skoðun,“ segir Sigurður spurður hvers vegna hann telji eðlilegt að mál Fögrubrekku bíði fram yfir kosningar. „Það hafa fleiri skipulagsmál verið á könnu sveitarfélagsins sem hafa tekið langan tíma og hefur verið lögð meiri áhersla á að klára,“ bætir oddvitinn við til nánari skýringar á þeim drætti sem þegar er orðinn á málinu.

„Það er ekki hægt að segja að þetta sé pólitík. Þetta er bara eiginhagsmunapot,“ útskýrir Eyjólfur. Þar vísar hann til hagsmuna í kringum nýja Staðarskálann sem vitanlega myndi fá samkeppni frá nýrri þjónustustöð kippkorn í burtu.

„Mín þolinmæði er nú að bresta,“ segir Eyjólfur sem kveður málið hafa reynst sér erfitt viðfangs því hann aki skólabíl og sé þannig starfsmaður Bæjarhrepps.

gar@frettabladid.is