Blindur leiðir haltan

Haltur leiðir blindan er fremur geðfellt hugtak og merkir tvo einstaklinga sem báðir eru ófullkomnir en bæta hvor annan upp þegar þeir þokast áfram lífsveginn. Öllu óviðfelldnari er sú mynd að blindur hafi forystuna og leiði hinn halta á vegferðinni. Við þá hugsýn fer maður strax að óttast að slíkum tveimur einstaklingum hlekkist á.

Á Íslandi hefur hið síðara orðið raunin og leiddi það til bankahruns. Siðblindingjar eru víst allt að 3.000 hér á landi, séu rannsóknir í Bandaríkjunum yfirfærðar á mannfjölda hér. Þeir siðblindu leiddu hina siðferðilega haltrandi sem reyndust nægilega margir til þess að hið ískyggilega ferðalag endaði í verulega harkalegum árekstri sem allir hér eru nú að blæða fyrir, fjárhagslega og andlega. Siðblindingjar geta víst ekki séð villu sína og eiga alltaf málsbætur sjálfum sér til handa, hversu slæmt sem framferði þeirra er gagnvart öðrum. Öllu einkennilegra er að þeir sem hafa sjón en eru siðferðilega haltrandi neiti að opna augun og viðurkenna hvað aflaga hefur farið á vegferðinni.

Of margir neita að sjá villuna sem þeir létu leiða sig í. Sumir taka aukinheldur upp háttalag siðblindingjans og finna afsökun fyrir því alvarlega ástandi sem þeir hafa fyrir tilstilli siðblindingjans leitt yfir þjóð sína. Það er alltaf slæmt þegar hópar fólks láta gera sig þannig að hálfblindum hjarðdýrum sem ana áfram án þess að staldra við.

Nú þarf fólk að opna augun og fá nýja sýn á framtíðina. Það er vænlegra til árangurs að skoða hvað aflaga hefur farið en gera útlendinga að blórabögglum fyrir vandræðum okkar. Varla skilar heldur góðum árangri að ráðast gegn því fólki sem er að reyna að rétta kúrsinn eftir villuferðina. Það er mikilvægt að varast aðferðir siðblindingja - upphrópanir og afneitun. Við þurfum vandað hugarfar til að móta nýtt Ísland og efnahagslegt svigrúm svo það takist.

Höfundur er blaðamaður og rithöfundur.