Pétur Jóhann leikur Sigga Hlemm í gamanþættinum Hlemmavideó

„Þetta fjallar um mann sem fær myndbandaleigu við Hlemm í arf og honum er ekkert sérstaklega vel við hana. En það er ekki það sem skiptir máli heldur það sem gerist eftir lokun. Og það á eftir að fá fólk til sperra bæði augu og eyru," segir Sigurjón Kjartansson, handritshöfundur og útvarpsmaður.

Ný sjónvarpsþáttaröð er smám saman að taka á sig mynd í Saga Film-húsnæðinu við Laugaveg 176. Þar sitja sveitt við skriftir í góða veðrinu þau Ari Eldjárn, Hugleikur Dagsson, Pétur Jóhann Sigfússon og María Reyndal undir styrkri og stundum harðri stjórn Sigurjóns.

Sigurjón segir gleymdu Reykjavík, hverfinu umhverfis Hlemm og Rauðarárstíg, vera gefið líf í þessum þáttum. Þau hafi meðal annars byrjað vinnuna á því að fara í nokkra bíltúra um þetta svæði og virt fyrir sér mannlífið í rannsóknarskyni.

María Reyndal er eina konan í hópnum en þegar hinni sígildu spurningu um hvernig það sé að vera eina stelpan í svona strákstóði er kastað fram tekur Sigurjón völdin aftur í sínar hendur. „Sko, það er ekki til neitt sem heitir fyndin kona og fyndinn karl. Annaðhvort ertu bara fyndin og þá skiptir engu hvort þú ert karlmaður eða kvenmaður," segir Sigurjón og hinir í hópnum þora ekki annað en að taka undir með „bossinum".

Þáttaröðinni hefur verið gefið heitið Hlemmavideó en hópurinn vildi ekki gefa upp hvenær farið yrði í tökur. Sigurjón segir þau ætla að vanda sig við handritið en það sé ekkert launungamál heldur að þættirnir eigi að fara á dagskrá í vetur á Stöð 2. Þannig að tökur verða á þessu ári.

Pétur Jóhann mun leika aðalhlutverkið í þáttaröðinni, Sigurð Hermannsson eða Sigga Hlemm. „Ef Hugleikur leyfir mér það," grínast Pétur með og Hugleikur mælir hann í kjölfarið út og kemst að þeirri rökréttu niðurstöðu að hann sé fullkominn í hlutverk manns sem leigir út vídeóspólur við Hlemm. Sigurjón hrifsar til sín orðið á nýjan leik og kemur því skýrt og greinilega á framfæri að þetta sé ekki þáttaröð um mann á myndbandaleigu.

„Nei, alls ekki, eins og ég sagði áðan, þá eru það hlutirnir sem gerast að kvöldlagi sem eiga eftir að koma áhorfendum í opna skjöldu." Undir þau orð tekur Hugleikur; hann hafi aldrei séð neitt þessu líkt í íslensku sjónvarpi.

„En ég slekk nú yfirleitt líka á sjónvarpinu þegar eitthvað íslenskt kemur. En ég mun ekki gera það núna." freyrgigja@frettabladid.is