Stjórnarskráin og breytingar

Þarf að breyta stjórnarskránni og er rétti tíminn núna. Já, það er ljóst að það þarf að breyta en auðvitað alltaf spurning hvenær rétti tíminn er til þess. Það hefur hins vegar verið tekin ákvörðun um að gera það núna.

Hverju finnst mér að þurfi að breyta? Ég tel nauðsynlegt að fá fram þrískiptingu valdsins. Þá á ég við aðskilja löggjafarvald og framkvæmdavald og að ráðherrar séu ekki jafnframt þingmenn.

Skilgreina þarf skýrt, valdsvið og valdamörk. Skýrt hver ber ábyrgð á hverju. Tryggja sjálfstæði dómstólanna og ráða þar faglega í stöður. Við þurfum að gera stjórnarskrá sem fara á eftir og setja ákvæði í hana sem tryggja að farið sé eftir henni. Þá þarf hún að vera skýrt skrifuð og á þann hátt að ekki sé hægt að margtúlka hana. Þá tel ég mikilvægt að fá í stjórnarskrá ákvæði sem girða fyrir möguleika á að hygla sérhagsmunum einstaklinga eða hópa. Möguleika á þjóðaratkvæðagreiðslum um mikilvæg mál. Þjóðin geti knúið fram þjóðaratkvæðagreiðslu um mikilvæg mál.

Forsetinn hafi málskostrétt og geti og eigi við vissar aðstæður að vísa málum til þjóðarinnar. Jafnrétti með sérstakri áherslu á jafnrétti kynjanna. Í dag eigum við falleg orð á blaði um jafnrétti (í lögum) en þó er mikill misbrestur á að þau séu virt t.d. launajafnrétti og jafna möguleika þegar sótt er um vinnu.

Ég vil sjá ákvæði í stjórnarskrá um jafna skiptingu kynja; á alþingi, í ríkisstjórn, hæstarétti, dómstólum, öllum stjórnum og ráðum á vegum ríkisins og helst víðarEf breyta á kjördæmaskipan og atkvæðavægi þarf að standa vörð um hag landsbyggðarinnar. Ég kysi óbreytt atkvæðavægi og óbreytta kjördæmaskipan. Atkvæðavægi, er eins og það er til að jafna hag landsbyggðar. Landsbyggðin hefur átt og á undir högg að sækja. Ég tel mjög varasamt að fara út í að jafna atkvæði og tel það ekki tímabært. Nokkur atriði í viðbót væru til dæmis grunngildi eins og lýðræði og mannrétttindi, uppplýsingaskylda, varðveita íslenskuna. Af hverju gef ég kost á mér ? Ég gef kost á mér vegna áhuga á að taka þátt í því einstaka verkefni sem endurskoðun stjórnarskrárinnar er. Ennfremur tel ég mikilvægt að þeir sem veljast á stjórnlagaþing séu ótengdir valdhöfum og auðjöfrum í landinu og mjög mikilvægt að þeir séu ekki studdir af sérhagsmunahópum eða stjórnmálaöflum.

Ég vil sjá fjölbreyttan hóp fólks af öllum stétum og allsstaðar af landinu. Ég hef fjölbreyttan bakgrunn, er viðskiptafræðingur, mamma og amma. Ég er alin upp á Norðurlandi, Akureyri, Ólafsfirði, Þingeyjarsýslu, Húnavatnssýslu, en ég bý í Grindavík. Ég er sveitastelpa að upplagi og hef verið sjómannskona í nærri 30 ár.Ég lofa að vinna af heilindum og hafa að leiðarljósi almannaheill og hagsmuni heildarinnar.

Réttlæti, sanngirni, heiðarleiki, jafnrétti og virðing eru gildi sem eru mér mikilvæg. Ég hef mikinn áhuga á að endurskoðuð stjórnarskrá verði vel úr garði gerð, skilmerkileg og auðskiljanleg. Mig langar að hvetja þjóðina til að nýta kosningaréttinn og kjósa. Það skiptir miklu máli að fá góða kosningaþátttöku.

Nýtið rétt ykkar til að hafa áhrif á hverjir veljast á þingið og kjósið.

Bendi lesendum á að skoða bloggsíðuna mína http://birnakristbjorg.123.is/blog/ til að fá nánari upplýsingar um mig ef áhugi er fyrir því. Kærar kveðjur til þín lesandi góður og megir þú eiga góðan dag. Birna Kristbjörg Björnsdóttir 4184