Össur og kollegar biðla til Írana

Utanríkisráðherrar Norðurlandanna lýstu í dag yfir miklum áhyggjum vegna frétta af því að aftaka írönsku konunnar Sakineh Mohammadi-Ashtiani væri yfirvofandi.

Kröfðust ráðherrarnir þess að írönsk stjórnvöld komi í veg fyrir að dauðadóminum verði fullnægt, samkvæmt tilkynningu á vef utanríkisráðuneytisins. Fyrr á árinu dæmdu Íranskir dómstólar Sakineh Mohammadi-Ashtiani til dauða.

Norrænu ráðherrarnir fimm lýsa algerri andstöðu við dauðarefsingar og skora á írönsk stjórnvöld að milda dóminn. Þá lýsa ráðherrarnir yfir áhyggjum vegna frétta af erfiðri stöðu mannréttindafrömuða í Íran, af handtökum án dóms og laga, pyntingum og réttarhöldum þar sem réttindi sakborninga séu fyrir borð borin.