Myndar á ótrúlegum stöðum

Franski kvikmyndagerðamaðurinn Vincent Moon hefur vakið mikla athygli fyrir tónlistarmyndbönd sín. En Moon þessi myndar þekktar sveitir á meðan þær leika tónlist sína á óhefðbundnum stöðum líkt og almenningssalernum eða götuhornum og nefnist verkefnið Take-Away Shows.

Myndböndin eru flest tekin í einni töku og hefur Moon meðal annars tekið upp tónlistarflutning hljómsveita á borð við Bon Iver, R.E.M., Arcade Fire, Beirut og íslensku hljómsveitarinnar Sigur Rós. Moon er staddur hér á landi í tengslum við kvikmyndahátíðina RIFF, en nokkur myndbönd hans verða sýnd á hátíðinni.

„Ég hafði gert tónlistarmyndbönd áður en ég byrjaði með Take-Away Show og þoldi ekki að þurfa að eiga við útgáfufyrirtækin. Forstjórarnir voru alltaf að reyna að koma sínum hugmyndum að en ég vildi fá að gera þetta á minn hátt. Ég er mikill aðdáandi lifandi tónlistar og með þessu langaði mig að prófa að fanga kraftinn sem myndast á tónleikum og festa hann á filmu," segir Moon.

Moon hyggst gera heimildarmynd um kvæðamanninn Steindór Andersen á meðan hann dvelur á landinu, en hann fékk veður af Steindóri þegar hann tók upp myndbandið með Sigur Rós. „Ég á eftir að heyra í honum og þess vegna er þetta allt svolítið óráðið enn sem komið er. En ég held að þetta verði mjög skemmtilegt verkefni," segir hann að lokum. - sm

Heimasíða Vincent Moon.