Margskipti um dulargervi dagana fyrir sprenginguna

Lögreglan í Danmörku hefur birt myndir úr eftirlitsmyndavélum hótelsins þar sem sprengja sprakk á föstudaginn. Hún hefur enn ekki náð að bera kennsl á manninn sem hún hefur í haldi grunaðan um að bera ábyrgð á sprengingunni.

Eina sem lögreglan veit er að maðurinn er um fertugt, og talar þýsku, frönsku og ensku. Hann hefur ekki sagt eitt aukatekið orð við lögreglu síðan hann var handtekinn en hann var með að minnsta kosti þrjú vegabréf í fórum sínum, meðal annars frá Belgíu og Lúxemborg.

Á myndskeiðum sem lögregla hefur birt úr eftirlitsmyndavélum sést maðurinn fara inn á klósett Jörgensen hótelsins á föstudaginn. Þar var hann í 38 mínútur að sýsla við sprengiefni sem hann hafði í fórum sínum. Eitthvað virðist hafa farið úrskeiðis hjá manninum því lítil sprenging varð inn á klósettinu og særðist maðurinn nokkuð við það. Á myndskeiðinu sést þegar hann leggur á flótta, nokkuð ringlaður en maðurinn fannst tveimur klukkustundum síðar í Örsstedsparken sem er hinum megin við götuna.

Höfuðáhersla lögreglu nú er að finna út hver þessi maður er og hvað hann ætlaði sér.

Ekstrabladet sagði frá því í dag að í fórum mannsins hefði fundist kort þar sem heimilisfang Jótlandspóstins var merkt sérstaklega en það er blaðið sem birti skopmyndir af Múhameð spámanni. Danska lögreglan hefur ekki viljað staðfesta að Jótlandspósturinn hafi verið sérstakt skotmark mannsins en segir hins vegar að allt bendi til þess að um misheppnað hryðjuverk sé að ræða.