Bassatöffarinn yfirgefur Interpol

Samkvæmt skilaboðum á vefsíðu Interpol hefur bassaleikarinn Carlos D yfirgefið hljómsveitina. Carlos var án efa þekktasti meðlimur hljómsveitarinnar, en hann þykir mikill töffari og náði meira að segja að skyggja á Paul Banks, söngvara og gítarleikara Interpol.

„Hann hefur ákveðið að fara aðrar leiðir og setja sér ný markmið," segir á vefsíðu hljómsveitarinnar. „Aðskilnaðurinn er óumflýjanlegur, en við óskum honum velgengni og hamingju. Við verðum áfram, eins og ávallt, aðdáendur þessa hæfileikaríka einstaklings."

Carlos D kláraði nýja plötu með Interpol áður en hann hætti, en verður ekki með hljómsveitinni á tónleikaferðalagi í sumar. Ekki hefur verið tilkynnt hvenær platan kemur út, en ljóst er að Interpol hitar upp fyrir U2 á árinu sem bendir til þess að platan er væntanleg fyrr en síðar.

Hægt er að hala niður nýju lagi Interpol, Lights, á heimasíðu þeirra.