Ekki deilt um Icesave-upphæðina heldur hvernig skal borga

Fjármálaráðherra Bretlands, Alistair Darling segir bresku ríkisstjórnina tilbúna til þess að sýna sveigjanleika í samningaviðræðum við Ísland um Icesave. Þetta sagði hann í viðtali við fréttastofu Reuters í dag.

Þá sagði Darling einnig að það væri ekki hægt að ætlast til þess að smáríki eins og Ísland borgaði háar fjárhæðir undir eins, slíkt væri óraunsætt.

Hann áréttaði einnig í viðtalinu að upphæð kröfunnar væri ekki deiluefni heldur hvernig íslenska ríkið hygðist borga upphæðina til baka. Hann sagði íslensk, hollensk og bresk yfirvöld hafa setið við samningaborðið undanfarnar vikur til þess að leysa málið.