Kallakór Kaffibarsins hefur upp raust sína

Nýstofnaður Kallakór Kaffibarsins samanstendur af syngjandi hesta- og bjórdrykkjumönnum sem hafa lengi stundað hinn víðfræga skemmtistað.

„Hugmyndin kviknaði eiginlega eftir að einn meðlimurinn hafði séð skemmtilega auglýsingu fyrir íþróttafyrirtækið Puma þar sem barrottur byrja skyndilega að syngja lag saman. Við ákváðum að stofna okkar eigin kór og fengum svo stórsöngvarann Jón Svavar Jósepsson til að taka að sér hlutverk kórstjóra, gerðum Facebook hóp og buðum nokkrum fastakúnnum og starfsmönnum Kaffibarsins að vera með," segir Hallbjörn Valgeir Rúnarsson, sem syngur rödd fyrsta bassa í Kallakórnum.

Kórinn var stofnaður í apríl síðaslitðin og eru meðlimir hans nú um tuttugu talsins og eru þeir flestir að stíga sín fyrstu skref sem söngvarar.

Æfingar fara fram vikulega á efri hæð Kaffibarsins og hafa gestir skemmtistaðarins margir hverjir orðið varir við ómþýðan söng kórsins á sunnudagskvöldum. „Þetta eru allt „amatörar" þannig við erum kannski ekki að flytja lög í sérstaklega flóknum útsetningum, en öll lögin eru þó tvírödduð og eitt er meira að segja fjórraddað."

Jómfrúartónleikar kórsins fara fram laugardaginn 12. júní á Humarsumri Kaffibarsins og að sögn Hallbjörns, sem er betur þekktur sem Halli Valli úr hljómsveitinni Ælu, hafa æfingar kórsins verið færðar um set svo hægt verði að æfa sönginn í ró og næði.

„Við ákváðum að æfa ekki á Kaffibarnum þessa vikuna því lagavalið á að koma fólki á óvart. Við munum flytja nokkur vel valin karlakórslög í eigin útsetningum og byrja tónleikarnir stundvíslega klukkan fimm í boði Thule." Inntur eftir því að lokum hvort ölið fari ekki illa með söngröddina neitar Halli Valli því. „Nei, ef eitthvað þá mýkir þetta hana bara."