Sjö ára strákur syrgir köttinn sinn og ræddi úrbætur við bæjarstjórann

„Það eru allir velkomnir, það eru engin aldursmörk," segir Lúðvík Geirsson bæjarstjóri í Hafnarfirði í samtali við Vísi. Fjarðarpósturinn greinir frá því þegar Lúðvík tók á móti Natani Erni Helgasyni, sjö ára gömlum Hafnfirðingi, á skrifstofu sína á dögunum.

Nathan hafði orðið fyrir því óláni að ekið var á köttinn hans á Ölduslóðinni með þeim afleiðingum að kötturinn drapst. Telur Natan að ökumenn keyri of hratt í götunni og ræddu hann og Lúðvík um mögulega uppsetningu á nýrri hraðahindrun í götunni. Það fylgir með í frétt Fjarðarpóstsins að áður hafi íbúar kvartað undan umferðarhraða þarna en ekki fengið nein viðbrögð.

Lúðvík segir í samtali við Vísi að þrátt fyrir ungan aldur sé Natan ekki sá yngsti sem hafi komið til viðtals á bæjarstjórnarskrifstofurnar. „Það hafa nú komið með foreldrum sínum nánast nýburar, en svona til að koma með formleg erindi og óskir þá man ég eftir einhverjum svona á aldrinum sex til sjö ára," segir Lúðvík.