Bæði KA-liðin komust í bikarúrslitin í blakinu

Bikarúrslitaleikirnir í Bridgestonebikarnum í blaki fara fram í Laugardalshöllinni í dag og eftir undanúrslitaleikina í gær er ljóst hvaða lið mætast í beinni útendingu í sjónvarpinu á eftir.

Kvennalið KA varð fyrst til að tryggja sér sæti í bikarúrslitunum þegar liðið vann 3-0 sigur á Fylki. KA mætir deildarmeisturum HK sem slógu út Þrótt Neskaupsstað með 3-0 sigri. Bikarúrslitaleikur kvenna hefst kl. 14.00 í Laugardalshöll.

KA og Stjarnan mætast síðan í bikarúrslitaleik karla. Deildarmeistarar KA unnu Þrótt Reykjavík 3-0 en Stjarnan sló út HK 3-2 eftir magnaðan leik þar sem oddahrinan endaði 16-14 fyrir Stjörnuna. Bikarúrslitaleikur karla hefst strax á eftir kvennaleiknum.