Unnið að gerð kvikmyndar um Ronnie

Framleiðendurnir Mark Joseph og Ralph Winter vinna nú hörðum höndum að því að koma af stað kvikmynd um ævi og starf Ronalds Reagan. Samkvæmt Empire-kvikmyndavefnum er Jonas McCord að skrifa handrit eftir tveimur ævisögum Pauls Kengor um þennan umdeilda Bandaríkjaforseta. Myndin á að fylgja eftir lífi Reagans sem ungs drengs og forsetatímabili hans en aðalfókusinn verður á árið 1981 þegar John Hinckley reyndi að myrða hann til að fanga athygli Jodie Foster.

McCord sagði við Hollywood Reporter að hann hefði aldrei verið mikill aðdáandi Reagan. „Í mínum huga var hann annaðhvort vondur leikari eða trúður,“ sagði McCord. En sú skoðun breyttist snarlega eftir að hafa kynnt sér ævi Ronalds sem var alinn upp af strangkaþólskum áfengissjúkum föður og heittrúaðri móður. Reagan hefur hins vegar aldrei notið sannmælis hjá Hollywood. Og framleiðandinn Mark Joseph segir að það sé eflaust leitun að jafn illa innrættri kvikmyndagerð og hjá þeim sem gerðu The Reagans með James Brolin í hlutverki Ronalds.

„Aðeins í Hollywood gætu menn gert kvikmynd sem væri móðgun við svona vinsæla manneskju, ráðið leikara sem augljóslega hataði sína persónu, horft á myndina fara til fjandans og ákveðið að enginn vildi sjá kvikmynd um Ronald Reagan,“ sagði Joseph.