Gríðarleg eyðilegging í Leogane

Alls hefur 54 verið bjargað lifandi úr rústum húsa á Haítí síðan skjálftinn reið yfir á þriðjudag. Það gefur íslensku björgunarsveitinni von um að enn sé ekki orðið of seint að finna fólk á lífi. Sveitin hefur verið að störfum í borginni Leogane í dag en hvergi er eyðileggingin meiri en einmitt þar.

Um 90% allra bygginga í borginni Leogane eru ónýt. Þar búa rúmlega 130 þúsund manns, fleiri en í Reykjavík. Neyðaraðstoð barst þangað seint þar sem hjálparstarfsmenn eiga enn í fullu fangi með að sinna íbúum höfuðborgarinnar.

Íslensku björgunarsveitarmennirnir komu til borgarinnar í dag og verða þar í nótt. Þeir segja eyðilegginguna þar gríðarlega.

„Það er greinilegt að þarna er mjög mikil eyðilegging. Fólk er búið komið sér fyrir á grasbölum og reyna að búa sér til einhverskonar skjól," segir Gísli Rafn Ólafsson, félagi í íslensku rústabjörgunarsveitinni á Haítí.

Íbúar í Leogane og bænum Jacmel sem er skammt frá hafa margir brugðið á það ráð að flýja þessar ömurlega aðstæður með bát. Einn þeirra, Elías Guðmundsson djákni sem staddur var Jacmel þegar skjálftinn reið yfir. Hann komst yfir til Dóminíska lýðveldisins með bát og er heill á húfi.

Margvíslegar fréttir hafa borist frá Haíti af óeirðum gripdeildum og ofbeldi. En þær segja ekki alla söguna. Fjölmörg dæmi eru um samhug og hjálpsemi fólksins sem reynir takast á við hörmungarnir sem dunið hafa á þeim. Og þá flestar kirkjur höfuðborgarinnar sé nú aðeins rústir einar kemur fólk engu að síður saman fer með bænir og syngur.