Favre þögull sem gröfin

Fjölmiðlar í Bandaríkjunum bíða með óþreyju eftir því að fá fréttir frá Brett Favre. Hvort hann ætli sér að hætta í boltanum eða spila áfram með Minnesota Vikings. Favre hefur greinilega lært af reynslunni því hann er þögull sem gröfin um framtíðaráform sín. Hann hefur fengið umhugsunartíma fram í byrjun mars til þess að ákveða sig. Eina sem Favre hefur látið hafa eftir sér er lítil kveðja á heimasíðu sinni þar sem hann þakkar fyrir stuðninginn í vetur. Ekki allir stuðningsmenn Vikings vilja halda Favre því talið er að félagið muni reyna að fá Donovan McNabb frá Philadelphia fari svo að Favre ákveði loks að hætta og að þessu sinni í alvöru.