Myndskreytir heimasíðu Cörlu Bruni

„Teymið í kringum forsetafrúna skoðaði síðan verkin okkar og valdi þá sem þeim leist vel á. Mér var í framhaldi af því boðið að myndskreyta tvö málefni á síðunni sem koma inn von bráðar," segir myndskreytirinn Erla María Árnadóttir. „Kærastinn minn, Jónas Valtýsson, starfar sem grafískur hönnuður á stofunni sem sér um þessa heimasíðu."

Erla María var nýlega valin í hóp til að myndskreyta heimasíðu forestafrúar Frakklands, Cörlu Bruni Sarkozy. Heimasíðan heldur utan um málefni sem forsetafrúin berst fyrir.

Erla, sem er 26 ára gömul, útskrifaðist árið 2008 úr hreyfimyndagerð og myndskreytingu frá skóla í Ítalíu. Hún fluttist svo til Brighton í Englandi þar sem hún starfar nú á eigin vegum. Málefnin sem Erla María myndskreytti var kynning á heimildarmynd sem gerð var um slæmar aðstæður fanga og kynning á danshóp sem vekur athygli á fátækt.

Hönnun Erlu Maríu hefur vakið athygli en bandaríska fyrirtækið ArtsProjekt bauð henni nýlega að selja nokkur verk á heimasíðu sinni. Fyrirtækið heldur úti alþjóðlegu verkefni þar sem listamenn og myndskreytarar geta haft vörur sínar til sölu án þess að missa eignarréttinn á þeim. Á þeirri síðu hefur Erla til sölu skó, hjólabretti og fatnað með myndum sem er hennar hönnun. Hægt er að skoða þau hér.

Erla hefur einnig unnið með kvikmyndaframleiðendum við gerð svokallaðra tilfinningamyndskreytinga. Það eru teikningar á tilfinningum sem leikstjórar vilja ná fram í völdum senum kvikmyndarinnar. Til að allir sem að þeim koma fái sömu sýn á tilfinningarnar eru teikningarnar hafðar á tökustaðnum svo allir viti hvað það er sem þeir eiga að nálgast.

„Það er í raun þunn lína á milli myndlistarmanna og myndskreytara nema þá helst það að myndskreytarar eru frekar í því að skreyta texta annarra," segir Erla María. Verk þeirra eru helst að finna í tímaritum, bókum og heimasíðum.

linda@frettabladid.is

Hér er heimasíða Cörlu Bruni.

Hér er heimasíða Erlu Maríu.