Sænska stjarnan til Íslands

Sænska poppstjarnan Robyn kemur fram á Iceland Airwaves í ár. Þetta er í fyrsta sinn sem Robyn kemur fram á tónleikum á Íslandi en söngkonan hefur notið mikilla vinsælda undanfarið. „Robyn er stærsta erlenda nafnið sem við höfum gefið upp fyrir hátíðina í ár,“ segir Egill Tómasson hjá Iceland Airwaves.

Robyn mun hafa haft mikinn áhuga á að koma á hátíðina og gerði því ráð fyrir Íslandi í tónleikaferðalagi sínu milli heimshorna. „Robyn er mjög spennt fyrir að koma til landsins og lítur á tónleikana hér sem lið í kynningarferð sinni um heiminn,“ segir Egill og bætir við að sænska poppstirnið sé að springa út sem tónlistarmaður um þessar mundir. Þetta er þó ekki í fyrsta sinn sem Robyn kemst í kynni við íslenskt skemmtanalíf. Hún þeytti skífum á Jacobsen fyrir ári við mikinn fögnuð íslenskra aðdáenda.

Egill segir að það sé ekki vaninn að fá svona frægan tónlistarmann eins og Robyn á hátíðina en að þeir séu mjög ánægðir með komu hennar. „Við reynum oft að finna frekar nýjar og ferskar hljómsveitir. Reynum að ná þeim áður en þær springa út. Robyn er þegar orðin stór á Norðurlöndunum og í Evrópu,“ segir Egill og bætir við að hann og aðstandendur hátíðarinnar vinni baki brotnu við að koma henni heim og saman. „Þetta gengur mjög vel og við höfum lagað okkur að breyttu umhverfi í þjóðfélaginu. Nú segjum við bara hljómsveitum sem eru að gera þetta fyrir peningana að fara eitthvert annað,“ segir Egill og bætir við að hann hafi frekar fundið fyrir auknum áhuga á landi og þjóð eftir eldgos og hrun en öfugt.

Nú hafa 23 erlendar sveitir staðfest komu sína á Iceland Airwaves þar á meðal Bombay Bicycle Club frá Bretlandi, Efterklang frá Danmörku og Slagsmålsklubben frá Svíþjóð.

alfrun@frettabladid.is