Segir ekki hægt að ýta á ON-hnapp fyrir Þingeyinga

Búist er við að Landsvirkjun ákveði síðar í vikunni að hefja rannsóknarboranir í Þingeyjarsýslum á ný eftir meira en tveggja ára hlé. Iðnaðarráðherra reyndi á Alþingi í dag að draga úr væntingum Þingeyinga um skjóta atvinnuuppbyggingu í héraðinu.

Til að mæta raforkuþörf álvers við Húsavík hefur Landsvirkjun undirbúið nýjar jarðvarmavirkjanir á þremur svæðum, í Kröflu, Bjarnarflagi og á Þeistareykjum. Rannsóknarborunum til undirbúnings þessum virkjunum var hins vegar hætt eftir að þáverandi umhverfisráðherra, Þórunn Sveinbjarnardóttir, fyrirskipaði svokallað sameiginlegt umhverfismat sumarið 2008.

Nú þegar niðurstöður þessa sameiginlega mats liggja fyrir hafa skapast forsendur til að hefja boranir að nýju og samkvæmt heimildum Stöðvar 2 verða tillögur um næstu borverkefni lagðar fyrir stjórn Landsvirkjunar síðar í vikunni. Einna brýnast þykir að bora meira á Þeistareykjum til afla frekari upplýsinga um hversu stóra virkjun það svæði geti borið og má telja líklegt að ákveðið verði að hefja boranir þar næsta vor.

Þessi mál voru rædd á Alþingi í dag þegar iðnaðarráðherra sagði í svari við fyrirspurn flokksbróður síns úr Samfylkingunni, Sigmundar Ernis Rúnarssonar, að nýtanleg orka í jörð í Þingeyjarsýslum væri talin vera á bilinu 440 til 590 megavött.

Sigmundur Ernir sagði Þingeyinga eiga það skilið að þessi orka í iðrum jarðar á svæðinu færi að vinna fyrir þá. Atvinnuleysi hafi verið á svæðinu í þeim skilningi að þaðan hafi fólk flutt brott.

Katrín Júlíusdóttir iðnaðarráðherra sló hins vegar á væntingar um skjóta atvinnuuppbyggingu og vísaði til stefnu Landsvirkjunar um sjálfbæra nýtingu. Það þýddi hægari uppbyggingu, sem væri þá í takti við getu náttúrunnar hverju sinni.

"Og menn vilja fara varlega í að gefa væntingar um að það sé hægt að kveikja á einhverjum mörghundruð megavöttum af einhverju afli bara með því að ýta á einn ON-hnapp, vegna þess að það er ekki þannig þegar jarðhitinn á í hlut," sagði Katrín.